అఖిల్.. ఆ స్టెప్పులేంటి బాబోయ్!

టాలీవుడ్ లో ప్రస్తుతం బెస్ట్ డ్యాన్సర్ ఎవరు అంటే.. ప్రధానంగా జూనియర్ ఎన్టీఆర్ - అల్లు అర్జున్ పేర్లు వినిపిస్తుంటాయి. రామ్ చరణ్ కూడా వీళ్లకు గట్టి పోటీనే. రామ్, సాయిధరమ్ తేజ్ కూడా డ్యాన్సింగ్ స్టార్స్ గా మంచి పేరే సంపాదించారు. ఇప్పుడు వీళ్లందరికీ పోటీగా ఇంకొకడు తయారయ్యాడు. అతనే... అక్కినేని వారబ్బాయి అఖిల్. డ్యాన్సుల విషయంలో తనపై పెట్టుకున్న అంచనాలకు ఏమాత్రం తగ్గకుండా మెస్మరైజింగ్ స్టెప్స్ తో థియేటర్లను షేక్ చేసేస్తున్నాడు అఖిల్.

నా ఇంట్లోనా ఇలాంటి డ్యాన్సర్ తిరుగుతున్నాడని ఆశ్చర్యపోయానంటూ ఆ మధ్య చెప్పాడు నాగార్జున. ఆయన మాటలు అప్పటికి అతిశయోక్తిగా అనిపించాయేమో కానీ.. ‘అఖిల్’ సినిమాలో కుర్రాడి డ్యాన్సులు చూస్తే మాత్రం నాగ్ అలా ఆశ్చర్యపోవడంలో ఆశ్చర్యం లేదు. ముఖ్యంగా ఇంట్రడక్షన్ సాంగ్ లో అఖిల్ వేసిన స్టెప్పులు నభూతో అనే చెప్పాలి. కాళ్లలో స్ప్రింగులేమైనా పెట్టుకున్నాడేమో అనిపించేలా అఖిల్ తన లెగ్స్ షేక్ చేసిన తీరు చూస్తే కళ్లు తిరగడం ఖాయం. మోకాలిపై కూర్చుని, లేడీ డ్యాన్సర్ చేయి పట్టుకుని ముందుకు జారుతూ వెళ్లే స్టెప్ అయితే మొత్తం పాటకే హైలైట్ అని చెప్పాలి. మిగతా పాటల్లోనూ అఖిల్ స్టెప్పులు మామూలుగా లేవు. మొత్తంగా అఖిల్ టాలీవుడ్ లో కాబోయే డ్యాన్సింగ్ స్టార్ అనడంలో సందేహం లేదు.