సూపర్ స్టార్లతో కాబోయే సూపర్ స్టార్ వార్

టాలీవుడ్ లో వారసులకు కొదవ లేదు. ఐతే తొలి సినిమా విడుదలకు ముందే క్రేజ్ తెచ్చుకున్న హీరోలు కొద్దిమందే. ఐతే వారసులందర్లోకి ఎక్కువ క్రేజ్ తెచ్చుకున్నది మహేష్ బాబే. అప్పట్లో ‘రాజకుమారుడు’ సినిమాకు విపరీతమైన హైప్ వచ్చింది. మళ్లీ ఇప్పుడు అఖిల్ సినిమాకు అంత కంటే ఎక్కువ హైప్ వచ్చింది. తెలుగులో అరంగేట్ర హీరోల సినిమాలకు సంబంధించి ఉన్న రికార్డులన్నీ బద్దలు కొట్టేశాడు అఖిల్. ఈ దీపావళికి బ్యాంగ్ బ్యాంగ్ ఎంట్రీ ఇవ్వడానికి రెడీగా ఉన్నాడు అఖిల్. కేవలం తెలుగు ప్రేక్షకులు మాత్రమే కాదు.. వేరే ఇండస్ట్రీల జనాలు సైతం అఖిల్ అరంగేట్రంపై ఓ కన్నేశారు.

ఐతే కాబోయే సూపర్ స్టార్ గా పేరు తెచ్చుకున్న అఖిల్.. అరంగేట్రంలో ముగ్గురు సూపర్ స్టార్లతో పోటీ పడుతుండటం విశేషం. ఆ ముగ్గురూ.. సల్మాన్ ఖాన్ - కమల్ హాసన్ - అజిత్. సల్మాన్ సినిమా తెలుగులో ‘ప్రేమ లీల’ పేరుతో అఖిల్ సినిమా వచ్చిన మరుసటి రోజు విడుదల కాబోతోంది. కర్ణాటక - తమిళనాడుల్లోనూ సల్మాన్ సినిమా భారీ స్థాయిలో విడుదల కాబోతోంది. అఖిల్ సినిమా కూడా ఆ రెండు రాష్ట్రాల్లోనూ విడుదల కాబోతోంది. కాబట్టి తన తొలి సినిమా టీజర్ రిలీజ్ చేసి విషెస్ చెప్పిన సల్మాన్ తోనే అఖిల్ పోటీ పడటం ఖాయం. మరోవైపు కమల్ సినిమా ‘తూంగావనం’ - అజిత్ సినిమా ‘వేదాలం’.. అఖిల్ సినిమా విడుదలకు ముందు రోజు ప్రేక్షకుల ముందుకు రానున్నాయి. ఆ సినిమాలతో కూడా అఖిల్ కు పోటీ ఉంటుంది. అఖిల్ సినిమా తెలుగు - తమిళ రెండు భాషల్లోనూ తమిళనాట సందడి చేయబోతోంది. కాబట్టి తమిళ సూపర్ స్టార్లతో రసవత్తర సమరం ఖాయం. ఇక అఖిల్ తెలుగు వెర్షన్ బెంగళూరులో భారీగా విడుదలవుతుంది. అక్కడ ముగ్గురు సూపర్ స్టార్లతోనూ అఖిల్ కు పోటీ ఉంటుంది. మరి ఈ పోటీలో ఎవరు గెలుస్తారో చూడాలి.