హలో.. సక్సెస్ లో పెదనాన్న వాటా

అఖిల్ నటించిన లేటెస్ట్ మూవీ హలో. మొదటి చిత్రంతో ఎదురుదెబ్బ తిన్న అఖిల్.. హలోతో డీసెంట్ టాక్ సంపాదించుకున్నాడు. వసూళ్లు కాస్త అటూఇటూగా కనిపిస్తున్నా.. మౌత్ టాక్ మాత్రం అదిరిపోతోంది. దీంతో హలో మూవీకి లాంగ్ రన్ ఉంటుందని.. సంక్రాంతి వరకూ మంచి వసూళ్లు వస్తాయని ట్రేడ్ జనాలు చెబుతున్నారు.

సినిమా రిలీజ్ కు ముందు ప్రెస్ మీట్స్ లో మాట్లాడేందుకు తటపటాయించిన అఖిల్.. ఇప్పుడు మాత్రం ధైర్యంగానే మీడియా ముందుకు వచ్చేస్తున్నాడు. సినిమా సక్సెస్ చేసినందుకు అందరికీ థ్యాంక్స్ చెప్పేస్తున్నాడు అఖిల్. మరి మీడియా జనాలు అంటే.. అటూఇటూ లింక్స్ పెట్టేయడంలో సిద్ధహస్తులు కదా. ఈ సక్సెస్ లో మెగా ఫ్యాన్స్ వాటా ఎంత అనే క్వశ్చన్.. అఖిల్ కు నేరుగానే ఎదురైంది. దీనికి అఖిల్ ఏమాత్రం మొహమాటపడకుండా.. సక్సెస్ క్రెడిట్ లో వాటా మెగాస్టార్ కి ఇచ్చేశాడు. తాను ఎవరినీ పెదనాన్న అని పిలవనని.. కానీ చిరంజీవిని మాత్రం ఇలా పిలవడానికి చాలానే కారణాలు ఉన్నాయని అన్నాడు అఖిల్.

మెగా ఫ్యాన్స్ కూడా చూడడం వల్లనే హలో ఈ స్థాయి సక్సెస్ ను అందుకుందని అఖిల్ ఉవాచ. అలా సినిమా రిలీజ్ కు ముందు మాత్రమే కాకుండా.. మంచి టాక్ వచ్చిన తర్వాత కూడా చిరంజీవిని పెదనాన్న అనడం కంటిన్యూ చేస్తూ.. సక్సెస్ లో షేర్ ను ఆయనకు కూడా పంచేశాడు అఖిల్. ఎలాంటి ఇగోలకు పోకుండా ఈ అక్కినేని యంగ్ హీరో మాట్లాడుతున్న తీరు అందరికీ నచ్చేస్తోంది.