అఖిల్.. బ్రహ్మిని ఇంటర్వ్యూ చేస్తే..

అఖిల్ ఏంటి.. బ్రహ్మానందాన్ని ఇంటర్వ్యూ చేయడమేంటి? అయినా ఏ టాపిక్ మీద? అఖిల్ ఏం ప్రశ్నలడిగాడు? బ్రహ్మానందం ఏం సమాధానాలిచ్చాడు? ప్రశ్నలన్నీ తన్నుకొచ్చేస్తున్నాయి కదా. ఐతే అర్జెంటుగా యూట్యూబ్ లోకి వెళ్లిపోండి. బ్రహ్మితో అఖిల్ చేసిన ఆసక్తికర ఇంటర్వ్యూ విశేషాలు చూసేయొచ్చు. హీరోగా తన తొలి సినిమా ‘అఖిల్’ను ప్రమోట్ చేయడం కోసం ఓ మేకింగ్ వీడియోలో భాగంగా బ్రహ్మితో సరదా సంభాషణ సాగించాడు అఖిల్.

‘అఖిల్’ షూటింగ్ స్పాట్ లోనే బ్రహ్మి పక్కన కూర్చుని ఆయన్ని ప్రశ్నలడిగాడు. ఇంటర్వ్యూ మొదలయ్యే ముందే బ్రహ్మి తనదైన శైలిలో పంచ్ వేశాడు. మేకింగ్ వీడియో కోసం మిమ్మల్ని కొన్ని ప్రశ్నలడుగుతాను అంటుంటే.. ‘‘సమాధానాలు తెలిసిన ప్రశ్నలు అడుగు ప్లీజ్’’ అంటూ జోక్ వేశాడు బ్రహ్మి. దానికి బదులుగా అఖిల్.. ‘‘మీకు సమాధానాలు తెలియకపోవడమేంటి సార్.. 31 ఇయర్స్ ఇండస్ట్రీ ఇక్కడ’’ అన్నాడు. అంతలోనే బ్రహ్మి.. ‘‘నువ్వా 31 ఇయర్స్ ఇండస్ట్రీ’’ అంటూ మళ్లీ పంచ్ వేశాడు.

ఆ తర్వాత ‘అఖిల్’ సినిమా అనుభవాల గురించి మాట్లాడమని చెప్పగా.. అఖిల్ ఫైట్లు - డ్యాన్సులు చూసి తాను చాలా ఆశ్చర్యపోయానని.. ఇంత బాగా ఎప్పుడు ప్రాక్టీస్ చేశాడో అని అన్నాడు బ్రహ్మి. మధ్య మధ్యలో అఖిల్ డ్యాన్స్ బిట్స్, యాక్షన్ సీక్వెన్స్ కు సంబంధించిన షాట్లు వేసి చూపించారు. అందులో అఖిల్ అదరగొట్టేశాడని వేరే చెప్పాల్సిన పని లేదులెండి.