ఈ ఏడాది చెప్పిన తేదీకి ప్రేక్షకుల ముందుకు వచ్చే హీరో అఖిల్ ఒక్కడే..!

యూత్ కింగ్ అఖిల్ అక్కినేని - స్టైలిష్ డైరెక్టర్ సురేందర్ రెడ్డి కాంబినేషన్ లో రూపొందుతున్న స్పై యాక్షన్ థ్రిల్లర్ ''ఏజెంట్''. ఏకే ఎంటర్టైన్మెంట్స్ మరియు సరెండర్2సినిమా బ్యానర్స్ పై రామబ్రహ్మం సుంకర - సురేందర్ రెడ్డి సంయుక్తంగా ఈ చిత్రాన్ని నిర్మిస్తున్నారు. అఖిల్ బర్త్ డే సందర్భంగా ఈ సినిమాని ప్రారంభిస్తూ.. 2021 డిసెంబర్ 24వ తేదీన విడుదల చేస్తామని మేకర్స్ ప్రకటించారు.

కరోనా సెకండ్ వేవ్ పరిస్థితుల కారణంగా టాలీవుడ్ లో సినిమాలన్నీ వాయిదా పడుతూ వచ్చాయి. ఆ మధ్య వరుసపెట్టి రిలీజ్ డేట్స్ ప్రకటించిన వారందరూ ఇప్పుడు తదుపరి మంచి రోజు కోసం ఎదురుచూస్తున్నారు. 'లవ్ స్టోరీ' 'టక్ జగదీష్' 'విరాటపర్వం' 'నారప్ప' 'ఆచార్య' 'అఖండ' 'ఖిలాడి' 'పాగల్' 'మేజర్' వంటి సినిమాలు వాయిదా పడ్డాయి. అలానే ఈ ఏడాదే ప్రేక్షకుల ముందుకు వస్తామని చెప్పిన 'రాధే శ్యామ్' 'ఆర్.ఆర్.ఆర్' 'పుష్ప' 'మోస్ట్ ఎలిజిబుల్ బ్యాచిలర్' 'రిపబ్లిక్' 'ఎఫ్ 3' 'గని' వంటి చిత్రాలు కూడా వచ్చే పరిస్థితి లేదు.

కానీ అఖిల్ నటిస్తున్న 'ఏజెంట్' సినిమా మాత్రం ముందుగా ప్రకటించిన తేదీకే విడుదలయ్యే అవకాశాలు కనిపిస్తున్నాయి. కరోనా థ‌ర్డ్ వేవ్ పరిస్థితులు వచ్చి, మ‌ళ్లీ లాక్ డౌన్లు
పెట్ట‌క‌పోతే.. డిసెంబ‌ర్ 24న 'ఏజెంట్' ను థియేటర్లలోకి తీసుకొచ్చేలా ద‌ర్శ‌క నిర్మాత‌లు షూటింగ్ ప్లాన్ రెడీ చేశారని తెలుస్తోంది. ఇదే కనుక జరిగితే ఈ ఏడాది ముందు ప్ర‌కటించుకున్న తేదీకి రిలీజ్ అయ్యే క్రేజీ మూవీ 'ఏజెంట్' మాత్ర‌మే అవుతుంది.

కాగా, సాలిడ్ హిట్ కోసం ఎదురుచూస్తున్న అఖిల్.. 'మోస్ట్ ఎలిజిబుల్ బ్యాచిలర్' 'ఏజెంట్' సినిమాలతో ట్రాక్ లోకి వస్తాడని అక్కినేని అభిమానులు నమ్మకంగా ఉన్నారు. దీని కోసం అఖిల్ కూడా శాయశక్తులా కృషి చేస్తున్నాడు. భారీ వర్కవుట్స్ చేసి 6 ప్యాక్ బాడీ రెడీ చేశాడు. ఇప్పటికే విడుదలైన 'ఏజెంట్' ఫస్ట్ లుక్‌ సినిమాపై అంచనాలు పెంచేసింది. ఈ చిత్రంలో అఖిల్ సరసన సాక్షి వైద్య హీరోయిన్‌ గా నటిస్తోంది. వక్కంతం వంశీ కథ అందిస్తున్న ఈ చిత్రానికి థమన్ సంగీతం సమకూరుస్తున్నాడు. రాగూల్ హెరియన్ ధారుమాన్ సినిమాటోగ్రఫీ.. నవీన్ నూలి ఎడిటింగ్ వర్క్ చేస్తున్నారు.