దీపావళికొస్తున్న అఖిల్?

అఖిల్ సినిమాకోసం ఎంతో ఆత్రుతగా ఎదురు చూస్తున్న అక్కినేని అభిమానులు మరికొంత కాలం ఆగాల్సిందే. ఎందుకంటే దసరా రోజు విడుదల కావాల్సిన ‘అఖిల్‘ సినిమా వాయిదా పడింది. క్లైమాక్స్ ఫైట్ కి సంబంధించిన గ్రాఫిక్స్ నాసిరకంగా వుండటమే ఈ సినిమా విడుదల వాయిదా పడటానికి కారణం. చాలా రోజుల నుంచి దసరా రోజు.. అంటే ఈ నెల అక్టోబరు 22వ తేదీన సినిమాను రిలీజ్ చేస్తామని చిత్ర నిర్మాత నితిన్ తో పాటు.. హీరో అఖిల్ కూడా చెబుతూ వస్తున్నారు. ఈ మేరకు సోషల్ మీడియాలో ప్రచారం చేస్తూనే వున్నారు. అయితే ఎక్కడో అనుమానం. బ్రూస్ లీ సినిమా విడుదలవుతోంది. మరో వారం రోజుల గ్యాప్ తో అఖిల్ సినిమా విడుదలవుతుందా అని. అయితే రెండు రోజుల క్రితం కూడా అఖిల్ సినిమా ఈనెల 22న విడుదలవుతోందని ఓ పోస్టర్ ను సోషల్ మీడియాలో పోస్ట్ చేశాడు. దాంతో అభిమానులంతా.. సినిమా కచ్చితంగా అనుకున్న సమయానికే విడుదలవుతుంది అనుకున్నారు. అయితే ఇటీవల నాగార్జున క్లైమాక్స్ కు సంబంధించిన యాక్షన్ సీక్వెన్స్ ను చూశాడట. అవి నాగ్ ఏ మాత్రం నచ్చకపోవడంతో సీజీ వర్క్ మళ్లీ చేయాలని టెక్నికల్ టీమ్ కు సూచించాడట. దాంతో సినిమా విడుదల వాయిదా అనివార్యమయింది. ఈ చిత్రాన్ని అన్ని కార్యక్రమాలు పూర్తి చేసి నవంబరు 11న ప్రేక్షకుల ముందుకు తీసుసుకు రావాలని చూస్తున్నారట.

ఈ దసరాకు అఖిల్ సినిమా విడుదల కానందున.. అక్కినేని అభిమానులు బాధపడతారని భావించి.. వారికి క్షమాపణ చెప్పారు హీరో నాగార్జున. అఖిల్ డెబ్యూ మూవీ కావడంతో చాలా జాగ్రత్తలు తీసుకుని.. సినిమాను ఎంతో క్వాలిటీగా ప్రేక్షకుల ముందుకు తీసుకొస్తాం అంటున్నాడు నాగ్. అందుకే అప్పటి వరకు కాస్త ఓపిక చేసుకొని వెయిట్ చేయమని చెబుతున్నాడు. సోషియే ఫాంటసీ జోనర్ లో తెరకెక్కుతున్న ఈ చిత్రానికి వి.వి.వినాయక్ దర్శకత్వం వహించారు. సయేషా సైగల్ హీరోయిన్. వెలిగొండ శ్రీనివాస్ కథ అందించగా... కోన వెంకట్ సంభాషణలు అందిస్తున్నాడు. నెల రోజుల క్రితమే విడుదలై అఖిల్ ఆడియోకు మంచి స్పందనే వస్తోంది. ఇక సినిమా విడుదల కావడమే తరువాయి. సో.. అక్కినేని అభిమానులూ దీపావళి వరకూ వెయిట్ చేయండి.