`బంగార్రాజు`లో అఖిల్ రోల్‌

అక్కినేని అఖిల్ న‌టించే నాలుగో సినిమా ఎప్పుడు ప్రారంభం కానుంది? ప‌్ర‌స్తుతం అభిమానుల్లో ఆస‌క్తిక‌ర చ‌ర్చ ఇది. అఖిల్ నాలుగో సినిమాని ప్ర‌క‌టిస్తాడ‌నే అభిమానులు ఎగ్జ‌యిట్ అవుతున్నారు. సోష‌ల్ మీడియాలో ఆస‌క్తి ని వ్య‌క్తం చేస్తున్నారు. ``నెక్స్ట్ మూవీ అనౌన్స్ చేస్తే బావుండేది అఖిల్ గారు`` అంటూ ఓ అభిమాని నేరుగా అఖిల్ కి ట్వీట్ చేయ‌డం ఆస‌క్తి రేకెత్తిస్తోంది. అఖిల్ పై వ‌రుస ట్వీట్లు ఫ్యాన్స్ నుంచి వెల్లువెత్తుతున్నాయి. అయితే ఈసారి కూడా అక్కినేని బుల్లోడు అఖిల్ లో డైల‌మా స్ప‌ష్టంగా క‌నిపిస్తోంది. ఈలోగానే అఖిల్ న‌టించే వేరొక సినిమా గురించి ఆస‌క్తిక‌ర చ‌ర్చ మొద‌లైంది. కింగ్ నాగార్జున క‌థానాయ‌కుడుగా న‌టిస్తున్న `బంగార్రాజు` చిత్రంలో అఖిల్ ఓ ఆస‌క్తిక‌ర పాత్ర‌లో న‌టించ‌నున్నాడ‌ట‌. ఆ మేర‌కు ద‌ర్శ‌కుడు క‌ళ్యాణ్ కృష్ణ‌ ఆ పాత్ర‌ను ఆస‌క్తిక‌రంగా డిజైన్ చేశాడ‌ని తెలుస్తోంది.

అయితే ఇది చివ‌రి నిమిషంలో అనూహ్యంగా చేసిన మార్పునా? అన్న చ‌ర్చ అభిమానుల్లో సాగుతోంది. వాస్త‌వానికి `బంగార్రాజు`లో చైతూ న‌టిస్తున్నాడ‌ని ప్ర‌చార‌మైంది. ఆ పాత్ర‌ను నాగ‌చైత‌న్య‌ను దృష్టిలో పెట్టుకునే కళ్యాణ్ కృష్ణ రాసుకున్నాడ‌ని ఇదివ‌ర‌కూ ప్ర‌చార‌మైంది. అయితే అనూహ్యంగా ఇప్పుడు అఖిల్ ఓ కీల‌క పాత్ర చేస్తున్నారంటూ ప్ర‌చారం సాగ‌డంతో కొద్దిపాటి క‌న్ఫ్యూజ‌న్ నెల‌కొంది. నాగ‌చైత‌న్య తో పాటు అఖిల్ కూడా బంగార్రాజులో క‌నిపిస్తాడా? లేక అఖిల్ మాత్ర‌మే ఈ చిత్రంలో ఆ కీల‌క‌పాత్ర‌లో న‌టిస్తున్నాడా? అన్న‌దానిపై క్లారిటీ రావాల్సి ఉంది.

మ‌రోవైపు అఖిల్ సామాజిక మాధ్య‌మాల్లో అభిమానులు ప్రేమాభిమానాల‌కు కృత‌జ్ఞ‌తలు తెలిపాడు. అన్న వ‌దిన‌ల `మ‌జిలీ` బ్లాక్ బ‌స్ట‌ర్ అన్న టాక్ వినిపించ‌డంతో అఖిల్ ఎంతో ఎమోష‌న‌ల్ ట్వీట్ చేశారు. ప్రేమలోని పెయిన్ కి సంబంధించిన చిత్రం మ‌జిలీ. ప్రేమ ఎక్క‌డ ఉంటుందో పెయిన్ అక్క‌డ ఉంటుంది..ఈ విజ‌యానికి శుభాకాంక్ష‌లు అంటూ మ‌జిలీ టీమ్ కి విషెస్ తెలిపాడు. `సోగ్గాడే చిన్ని నాయ‌నా` చిత్రానికి సీక్వెల్ గా `బంగార్రాజు` తెర‌కెక్కుతున్న సంగ‌తి తెలిసిందే. జూలైలో సెట్స్ పైకి తీసుకెళ‌తార‌ని తెలుస్తోంది. అన్న‌పూర్ణ స్టూడియోస్ - మ‌నం ఎంట‌ర్ ప్రైజెస్ సంయుక్తంగా ఈ చిత్రాన్ని నిర్మించ‌నున్నాయి.