అఖిల్ సినిమా ఆయ‌న పెళ్లి త‌ర్వాతే

అక్కినేని క‌థానాయ‌కుడు అఖిల్ రెండో సినిమా విష‌యంలో నాట‌కీయ ప‌రిణామాలు చోటు చేసుకున్నాయి. ఆ చిత్రం కృష్ణ‌గాడి వీర ప్రేమ‌గాథ ఫేమ్ హ‌ను రాఘ‌వ‌పూడి ద‌ర్శ‌క‌త్వంలో తెర‌కెక్క‌బోతోంద‌ని స్వ‌యంగా అఖిల్ ప్ర‌క‌టించాడు. మ‌రి ఏమైందో ఏంటో కానీ వారం రోజుల్లోపు ద‌ర్శ‌కుడు మారిపోయాడు. హ‌ను ప్లేస్‌ లో విక్ర‌మ్ కె.కుమార్ వ‌చ్చాడు. అక్కినేని కుటుంబానికి మ‌నంలాంటి ఓ మంచి చిత్రాన్నిచ్చిన ద‌ర్శ‌కుడు విక్ర‌మ్ కె.కుమార్‌. సిసింద్రీ త‌ర్వాత అఖిల్‌ ని తెర‌పై ఓ మెరుపులా చూపించింది కూడా ఆయ‌నే. `మ‌నం`లో అఖిల్ కాసేపు త‌ళుక్కున మెరిసిన విష‌యం తెలిసిందే. ఆ కొన్ని క్ష‌ణాల్లో అఖిల్ క‌నిపించిన విధానం చూసి ఫ్యాన్స్ ఖుషీ అయిపోయారు. అందుకే అఖిల్‌ ని స్టైలిష్‌ గా చూపించే ద‌మ్ము - అఖిల్ హిట్టివ్వ‌గ‌ల స‌త్తా విక్ర‌మ్‌ కే ఉంద‌ని నాగార్జున భావిస్తున్నాడ‌ట‌.

ఇటీవ‌ల ప‌నిగ‌ట్టుకొని విక్ర‌మ్‌ తో ఓ క‌థ‌ని సిద్ధం చేయించాడ‌ట నాగార్జున‌. అది చాలా బాగా న‌చ్చింద‌ట‌. దీంతో హ‌నుని ప‌క్క‌కు త‌ప్పించి ఆ ప్లేస్‌ లో విక్ర‌మ్‌ తో సినిమాని సెట్ చేయించాడు నాగ్‌. ఆ చిత్రం ఎప్పుడు మొద‌ల‌వుతుంద‌న్న విష‌యంపై తాజాగా క్లారిటీ వ‌చ్చింది. ఈ నెల 29న కొబ్బ‌రికాయ కొట్ట‌బోతున్నారు. అయితే రెగ్యుల‌ర్ షూటింగ్ మాత్రం అక్టోబ‌రులో మొద‌లుపెడ‌తార‌ట‌. స్క్రిప్టంతా ప‌క్కాగా సిద్ధ‌మైంది కాబ‌ట్టి సెప్టెంబ‌రులోనే షూటింగ్ మొద‌లుపెట్టొచ్చు కానీ, ఆ నెల‌లో విక్ర‌మ్ పెళ్లి ఉంద‌ట‌. త‌న పెళ్లి కోసం నెల రోజులు స‌మ‌య‌మ‌డిగాడ‌ట విక్ర‌మ్‌. దీంతో ఆ పెళ్లి సంద‌డి పూర్త‌య్యాకే అక్టోబ‌రులో సినిమా షూటింగ్‌ ని మొద‌లుపెడ‌తార‌ని తెలిసింది.