అఖిల్‌ చెబుతున్న వీడియో ముచ్చట

ఎప్పటికప్పుడు తన సినిమా విశేషాల్ని అభిమానులతో పంచుకొంటూనే ఉన్నాడు అఖిల్‌. కొన్నాళ్ల క్రితమే స్పెయిన్‌లో ఓ భారీ షెడ్యూల్‌ని పూర్తి చేసుకొని తిరిగొచ్చారు. అక్కడ ఏమేం చేస్తున్నదంతా ట్విట్టర్‌ ద్వారా పంచుకొన్నాడు. ఇప్పుడు మళ్లీ థాయ్‌లాండ్‌ షెడ్యూల్‌ కోసం ప్రయాణం కట్టబోతున్నాడు. ఆ వివరాల్ని వెల్లడిస్తూ... థాయ్‌లాండ్‌ వెళ్లేలోపు ఓ వీడియోని విడుదల చేస్తానని తీపి కబురు వినిపించాడు. ఇప్పుడు అక్కినేని అభిమానులంతా ఆ వీడియో కోసమే ఎదురు చూస్తున్నారు. ఇంతకీ ఆ వీడియోలో ఏముంది? సినిమాకి సంబంధించి టీజర్‌లాంటిదేమైనా విడుదల చేస్తాడా లేక ఇంకేదైనానా? అన్నది ఇప్పుడు ఆసక్తికరంగా మారింది.

వి.వి.వినాయక్‌ చేతులమీదుగా పరిచయమవుతున్నాడు అఖిల్‌. కథానాయకుడు నితిన్‌ నిర్మిస్తున్న ఈ చిత్రంపై భారీ అంచనాలు ఉన్నాయి. అయితే అఖిల్‌ మాత్రం ఆ అంచనాల్ని ఏమాత్రం హైప్‌ చేయకుండా, సినిమా గురించి మరీ ఎక్కువగా చెప్పకుండా సాగిపోతున్నాడు. 'మనం'లో అఖిల్‌ కనిపించిన విధానమే ప్రేక్షకులకు పిచ్చపిచ్చగా నచ్చేసింది. ఇక పూర్తిస్థాయిలో ఆయన సందడిని ఎప్పుడెప్పుడు చూద్దామా అన్నట్టు ఎదురు చూస్తున్నారంతా. ఆ ఎదురు చూపులకి మించి ఎక్కువ అంచనాలు క్రియేట్‌ చేయకూడదన్నది అక్కినేని కుటుంబం ఆలోచన. ఆ మేరకే సైలెంట్‌గా సినిమాని కానిచ్చేస్తున్నారు. అఖిల్‌ థాయ్‌లాండ్‌లో వారం రోజుల పాటు ఉంటాడని తెలుస్తోంది. అక్కడ కొన్ని ఛేజింగ్‌ సన్నివేశాలు తెరకెక్కించబోతున్నారని సమాచారం.