చరణ్ బాటలో అఖిల్

తన తండ్రి చిరంజీవి పుట్టిన రోజు నాడు తన కొత్త సినిమా ఫస్ట్ లుక్ టీజర్ ద్వారా కానుక ఇవ్వాలని చూస్తున్నాడు రామ్ చరణ్. ఇలా చేసి ఇటు తండ్రిని, అటు అభిమానుల్ని సంతోషపెట్టాలనుకుంటున్నాడు చెర్రీ. ఈ ఏడాదే హీరోగా అరంగేట్రం చేయబోతున్న అఖిల్ కూడా చరణ్ బాటలోనే నడుస్తున్నాడు. చరణ్ లాగే తండ్రి పుట్టిన రోజు నాటికి తన సినిమా టీజర్ వచ్చేలా ప్లాన్ చేస్తున్నాడు. చిరంజీవి పుట్టిన రోజుకు సరిగ్గా వారం తర్వాత నాగ్ పుట్టిన రోజు వస్తుంది. ఆగస్టు 22న చిరు పుట్టిన రోజు కాగా.. 29న నాగ్ పుట్టాడు. ఆ రోజు అఖిల్, వి.వి.వినాయక్ మూవీ టీజర్ రిలీజవుతుందని సమాచారం.

అఖిల్ ఇప్పటికే రెండు మూడు మేకింగ్ వీడియోలతో రచ్చ చేశాడు. ఐతే టీజర్ వీటన్నింటికంటే ప్రత్యేకంగా ఉండేలా విభిన్నంగా రూపొందిస్తున్నాడట వినాయక్. ఇంకా పేరు పెట్టని ఈ సినిమా షూటింగ్ దాదాపుగా పూర్తి కావచ్చింది. స్పెయిన్, థాయిలాండ్ షెడ్యూళ్లు పూర్తి చేసుకొచ్చిన వినాయక్ టీమ్.. ఇప్పుడు హైదరాబాద్ లో బ్యాలెన్స్ టాకీ పార్ట్ పూర్తి చేసే పనిలో ఉన్నారు. సెప్టెంబరులో ఆడియో విడుదల చేసి.. అక్టోబరులో దసరా సందర్భంగా సినిమాను విడుదల చేయాలన్నది ప్లాన్. నితిన్ నిర్మాణంలో తెరకెక్కుతున్న ఈ సినిమాలో అఖిల్ సరసన ముంబయి అమ్మాయి సాయేషా సైగల్ నటిస్తోంది.