అఖిల్ స‌ర‌స‌న అబ‌ద్ధం భామ‌

మొద‌టి సినిమాతోనే గ్రాండ్ ఎంట్రీ ఇవ్వాల‌నుకున్నాడు నాగార్జున చిన్న త‌న‌యుడు అఖిల్‌. నితిన్ నిర్మాత‌గా వ్య‌వ‌హ‌రించిన ‘అఖిల్’ సినిమా, ఆశించిన ఫ‌లితం రాబ‌ట్ట‌డంలో ఘోరంగా విఫ‌ల‌మైంది. ఆ సినిమా ఇచ్చిన షాక్‌ తో రెండో సినిమా చేయ‌డానికి ఏకంగా రెండేళ్ల స‌మ‌యం తీసుకున్నాడు అఖిల్‌. మూడో సినిమాకి త‌న నిర్మాత హీరోయిన్‌ నే ఎంచుకున్నాడు అఖిల్‌.

రీ-లాంచ్ చిత్రంగా చేసిన రెండో సినిమా ‘హ‌లో’ కూడా అఖిల్‌కు ఆశించిన ఫ‌లితాన్ని ఇవ్వ‌లేక‌పోయింది. దాంతో మూడో సినిమా ఎవ‌రితో చేయాలా అని చాలా రోజులు ఆలోచించి, ‘తొలిప్రేమ‌’ ద‌ర్శ‌కుడు వెంకీ అట్లూరీకి అవ‌కాశం ఇచ్చాడు అక్కినేని వార‌సుడు. ఏప్రిల్ నుంచి షూటింగ్‌ కి వెళుతున్న ఈ సినిమాలో హీరోయిన్‌గా ‘లై’ భామ మేఘా ఆకాశ్ ఎంపిక‌య్యింద‌ని స‌మాచారం. ‘లై’ సినిమా ఆశించినంత‌గా ఫ‌లితం రాబ‌ట్ట‌లేక‌పోయినా, మేఘా ఆకాశ్‌ తో ఏర్ప‌డిన స్నేహం కార‌ణంగా త‌న 25వ సినిమా ‘ఛ‌ల్ మోహ‌న‌రంగ’ లోనూ ఆమెనే ఎంచుకున్నాడు నితిన్‌. షూటింగ్ ముగించుకున్న ఈ సినిమా వ‌చ్చే వారం విడుద‌ల‌కు సిద్ధ‌మ‌వుతోంది.

ఈ సినిమా విడుద‌ల కాక‌ముందే అఖిల్ సినిమాతో అదిరిపోయే అవ‌కాశం కొట్టేసింది మేఘా. ఈ సినిమాకు బీవీఎన్ ఎస్ ప్ర‌సాద్ నిర్మాత‌గా వ్య‌వ‌హ‌రిస్తున్నాడు. మూడో సినిమాకు ఎటువంటి భారీ అంచ‌నాలు లేకుండా సింపుల్ ఫీల్ గుడ్ ల‌వ్ స్టోరీ చేయాల‌నుకుంటున్నాడు అఖిల్‌.