అఖిల్‌ మరో సినిమా వరకు ఆగాల్సిందే

మెగా, నందమూరి ఫ్యామిలీలకు చెందిన యంగ్‌ హీరోలు రామ్‌ చరణ్‌, ఎన్టీఆర్‌ లు వరుసగా బ్లాక్‌ బస్టర్‌ సక్సెస్‌ లను అందుకుంటూ, టాలీవుడ్‌ టాప్‌ హీరోలుగా ఇండస్ట్రీని ఏలేస్తున్న సమయంలో అక్కినేని ఫ్యాన్స్‌ అఖిల్‌ వచ్చి వారికి సరైన పోటీ ఇచ్చి స్టార్‌ హీరోగా నిలుస్తాడని నమ్మకం పెట్టుకున్నారు. భారీ అంచనాల నడుమ 'అఖిల్‌' చిత్రంతో అఖిల్‌ ఎంట్రీ ఇచ్చాడు. దాదాపు రెండేళ్ల పాటు అదుగో ఇదుగో అంటూ ఎన్నో కథలు విని, దర్శకులను మార్చి చివరకు వినాయక్‌ దర్శకత్వంలో 'అఖిల్‌' చిత్రాన్ని చేశాడు. ఆ చిత్రం దారుణమైన పరాజయం పాలైంది. ఆ తర్వాత నాగార్జున స్వయంగా రంగంలోకి దిగి 'హలో' చిత్రాన్ని విక్రమ్‌ కుమార్‌ దర్శకత్వంలో నిర్మించాడు.

'హలో' చిత్రం కూడా ఫ్లాప్‌ అవ్వడంతో స్టార్‌ హీరోల జాబితాలో చేరాలనే అఖిల్‌ కోరిక నెరవేరలేదు. హలో చిత్రం తర్వాత ఎన్నో కథలు విన్న అక్కినేని హీరో వెంకీ అట్లూరిపై నమ్మకంను పెట్టారు. తొలిప్రేమ వంటి కమర్షియల్‌ సక్సెస్‌ ను వరుణ్‌ కు ఇచ్చాడు కనుక అఖిల్‌ కు కూడా యూత్‌ ఫుల్‌ ఎంటర్‌ టైనర్‌ తో ఒక సూపర్‌ హిట్‌ ఇస్తాడని నాగార్జున నమ్మాడు. కాని అఖిల్‌ మూడవ సినిమా కూడా అంతంత మాత్రమే అన్నట్లుగా నిలిచింది. దాంతో అఖిల్‌ కు మరియు అక్కినేని అభిమానులకు ఈసారి కూడా నిరాశే మిగిలింది.

అక్కినేని ఫ్యామిలీ నుండి అప్పట్లో ఏయన్నార్‌, ఆ తర్వాత నాగార్జున టాలీవుడ్‌ లో టాప్‌ హీరోలుగా ఉండేవారు. ప్రస్తుతం మాత్రం టాలీవుడ్‌ స్టార్‌ హీరోల జాబితాలో అక్కినేని వారు చివరి వరుసలో ఉన్నారు. అఖిల్‌ ఆ లోటును భర్తీ చేస్తాడని నమ్మకం పెట్టుకున్న అక్కినేని ఫ్యాన్స్‌ కు వరుసగా నిరాశే ఎదురవుతోంది. మరి అఖిల్‌ తర్వాత సినిమాతో అయినా సక్సెస్‌ ను దక్కించుకుని ఫ్యాన్స్‌ కోరికను తీర్చుతాడేమో చూడాలి. అఖిల్‌ నాల్గవ సినిమాపై ఇంకా ఎలాంటి ఇన్ ఫర్మేషన్‌ లేదు. త్వరలోనే ఒక క్లారిటీ వచ్చే అవకాశం ఉంది.