అఖిల్ డేట్ ఫిక్స్ చేసేశారా?

అవును.. అక్కినేని అఖిల్ లాంఛింగ్ మూవీ అఖిల్ కి రిలీజ్ డేట్ సెట్ అయింది. అక్టోబర్ 22న విడుదల కావాల్సిన అఖిల్ పలు కారణాలతో వాయిదా పడింది. గ్రాఫిక్స్ వర్క్ కారణం అని నాగ్ వివరణ ఇచ్చినా.. దీనిపై అభిమానులు మాత్రం సంతృప్తి చెందలేదు. నిర్మాత దర్శకులను అక్కినేని ఫ్యాన్స్ తిట్టిన తిట్టకుండా తిట్టేశారు. అయితే.. ఈసారి మాత్రం రిలీజ్ డేట్ దీపావళికి, అంటే నవంబర్ 11కి ఫిక్స్ అయినట్లు తెలుస్తోంది.

ఆ రోజున అఖిల్ ని విడుదల చేస్తామని.. హీరో - డైరెక్టర్ - నాగార్జునల్లో ఎవరూ ఇంకా అధికారికంగా ప్రకటించలేదు. కానీ ఓవర్సీస్ డిస్ట్రిబ్యూటర్స్ ఈ విషయాన్ని లీక్ చేశారు. నవంబర్ 11కి మూవీ రిలీజ్ కాబోతున్నట్లు వాళ్ల దగ్గర సమాచారం ఉంది. అందుకే నవంబర్ 10న ప్రీమియర్ షోస్ కూడా ప్లాన్ చేసుకుంటున్నారు. ఇప్పటికే చాలా చోట్ల థియేటర్లకు అడ్వాన్స్ లు కట్టే పని కూడా మొదలైపోయిందని టాక్. త్వరలో ఈ అంశాన్ని నాగ్ స్వయంగా ప్రకటించే ఛాన్స్ ఉంది. నిజానికి మూవీ లేట్ అయితే.. జనాల్లో హైప్ తగ్గిపోయే అవకాశం ఉంటుంది.

కాకపోతే.. మరో ఫెస్టివల్ సీజన్ కి వస్తుండడం అఖిల్ కి కలిసొచ్చే అంశంగా చెప్పుకోవాలి. దసరాకి రాలేకపోయిన అఖిల్.. దీపావళికి వచ్చి ఫ్యాన్స్ ని అలరించనున్నాడన్నమాట. ఈసారి లేట్ చేయకుండా పక్కాగా ఉండాలని నాగ్ నుంచి యూనిట్ కి స్ట్రిక్ట్ ఆర్డర్స్ అందాయని చెప్పుకుంటున్నారు టాలీవుడ్ జనాలు. త్వరలో సెన్సార్ కి పంపి.. అడ్వాన్స్ బుకింగ్స్ కూడా స్టార్ట్ చేయనున్నారు.