'ఏజెంట్' సినిమాతో అఖిల్ స్టార్ అవుతాడు!

టాలీవుడ్ దర్శకులలో సురేందర్ రెడ్డి స్థానం ప్రత్యేకం. సురేందర్ రెడ్ది పేరు వినగానే 'కిక్' .. 'రేసు గుర్రం' .. 'ధ్రువ' .. 'సైరా' సినిమాలు కళ్లముందు కదలాడతాయి. ఆయన టేకింగ్ చాలా స్టైలీష్ గా ఉంటుంది. హీరోలను కూడా ఆయన చాలా స్టైలీష్ గా చూపిస్తూ ఉంటాడు. గీతా ఆర్ట్స్ బ్యానర్లలో సినిమాలు చేయడం వలన, ప్రస్తుతం అఖిల్ తో 'ఏజెంట్' సినిమా చేస్తున్నందు వలన, ఆయనకు ఈ ఇద్దరితోను మంచి సాన్నిహిత్యం ఉంది. ఈ కారణంగా ఈ వేడుకకు ఆయన హాజరయ్యాడు. సక్సెస్ మీట్లో ఆయన మాట్లాడాడు.

"అందరికీ నమస్కారం .. అల్లు అరవింద్ గారికీ .. బన్నీ వాసుగారికీ .. వాసు వర్మగారికి .. భాస్కర్ గారికి ముందుగా అభినందనలు తెలియజేస్తున్నాను. ఒక మంచి టీమ్ నిజాయితీగా కలిసి వర్క్ చేస్తే సక్సెస్ అనేది తప్పకుండా వస్తుంది. దానికి ఉదాహరణనే ఈ 'బ్యాచ్ లర్'. అరవింద్ గారి గురించి చెప్పాలంటే రెండు సినిమాలను నేను ఆయన కంపెనీలో చేశాను. అరవింద్ గారితో మళ్లీ తొందరలో ఒక సినిమా చేయాలనుంది . మరి ఆయన ఎప్పుడు చేస్తారో తెలియదు. అలాంటి ప్రొడ్యూసర్ ను నేను ఇప్పటివరకూ చూడలేదు.

ఆయనతో వర్క్ చేస్తున్నంత సేపు చాలా హాయిగా ఉంటుంది. అరవింద్ గారితో చేస్తే ఆ ఎనర్జీయే వేరు. ఈ సక్సెస్ ప్రేక్షకులకు .. ఇండస్ట్రీకి ఒక ఎనర్జీని ఇచ్చింది. అఖిల్ కి ఎంత ఎనర్జీని ఇచ్చిందో నాకు తెలుసు .. అంతకంటే ఎక్కువ ఎనర్జీని నాకు వచ్చింది. ఈ సినిమా అఖిల్ ని ఒక ఆర్టిస్ట్ గా మరింత పై స్థానానికి తీసుకెళ్లింది. నెక్స్ట్ నా 'ఏజెంట్'తో ఆయనను ఒక స్టార్ గా చూస్తారు. ఇంతకంటే ఇప్పుడు ఎక్కువేమీ మాట్లాడలేను" అంటూ చెప్పుకొచ్చాడు.

సురేందర్ రెడ్డి ఏ కథను ఎంచుకున్నా నీట్ గా .. పెర్ఫెక్ట్ గా ఉంటుంది. ఇక ఆయన సినిమాల్లో హీరో రొటీన్ కి భిన్నంగా న్యూ లుక్ తో కనిపిస్తాడు. 'ఏజెంట్' సినిమాలోనూ అఖిల్ కొత్త లుక్ తో కనిపించనున్నాడు. ఇక సురేందర్ రెడ్డి తెరకెక్కించే యాక్షన్ సన్నివేశాలకు మిగతా వాళ్లకి భిన్నంగా ఉంటాయి. ఇక ఈ సినిమా తరువాత ఆయన పవన్ కల్యాణ్ తో ఒక సినిమా చేయడానికి రెడీ అవుతున్నాడు. త్వరలోనే అందుకు సంబంధించిన వివరాలు తెలియనున్నాయి.