కొత్త సెంటిమెంట్: అక్కినేని అక్టోబర్

అక్కినేని నాగచైతన్య నటించిన ప్రేమమ్ రిలీజ్ కి రెడీ అయిపోయింది. చైతు మూడు రకాల గెటప్స్ లో కనిపించే ఈ సినిమాను.. మలయాళ ప్రేమమ్ కి రీమేక్ గా అదే పేరుతో రీమేక్ చేశారు. నాగచైతన్యకి జోడీగా అనుపమా పరమేశ్వరన్.. శృతి హాసన్.. మడొన్నా సెబాస్టియన్ లు నటించగా.. చందూ మొండేటి దర్శకత్వంలో రూపొందిన ఈ మూవీపై అంచనాలు చాలానే ఉన్నాయి. ఇప్పుడీ సినిమా రిలీజ్ డేట్ పై ఓ ఆసక్తికరమైన పోలికను పట్టుకొచ్చారు అక్కినేని అభిమానులు.

అక్కినేని నాగార్జున కెరీర్ లో చెప్పుకోదగిన కొన్ని బ్లాక్ బస్టర్లు ఈ నెలలోనే వచ్చాయి. అక్టోబర్ 4న కృష్ణవంశీ డైరెక్షన్ లో రూపొందిన నిన్నే పెళ్లాడుతా(1996) రిలీజ్ అయింది. నాగ్ ని మళ్లీ రొమాంటిక్ హీరో గ్రీకువీరుడుగా మార్చేసిన ట్రెమండస్ మూవీ ఇది. అక్టోబర్ 5న తెలుగు సినీ ఇండస్ట్రీ గర్వంగా చెప్పుకునే శివ(1989) చిత్రం రిలీజ్ అయింది. రామ్ గోపాల్ వర్మ దర్శకత్వంలో వచ్చిన ఈ మూవీ.. టాలీవుడ్ కి ఓ కీలక మలుపు. శివ కు ముందు శివకి తర్వాత అని టాలీవుడ్ ని లెక్కపెట్టడం తెలిసిందే. ఇక అక్టోబర్ 6న అల్లరి అల్లుడు(1993) అంటూ నాగార్జున తెగ సందడి చేసేశాడు.

ఇప్పుడు అక్టోబర్ 7న చైతు ప్రేమమ్ రిలీజ్ అవుతోంది. నాగార్జున మాదిరిగానే రొమాంటిక్ హీరో ఇమేజ్ ను కంటిన్యూ చేస్తున్న చైతుకు.. ఈ అక్టోబర్ సెంటిమెంట్ బాగానే కలిసొస్తుందని.. కెరీర్ లో నిలిచిపోతుందని అక్కినేని ఫ్యాన్స్ ఆశలు పెట్టుకున్నారు.

Like Us on Facebook : https://www.facebook.com/Tupakidotcom/