కింగ్ నాగ్ ఇలా చేస్తున్నాడేంటి..??

కింగ్ అక్కినేని నాగార్జున ఆరు పదుల వయసులోనూ యువ హీరోలకు పోటీగా వరుస సినిమాలు చేస్తూ దూకుడు చూపిస్తున్నారు. ఇటీవల తనయుడు నాగచైతన్యతో కలిసి 'బంగార్రాజు' వంటి బ్లాక్ బస్టర్ అందుకున్న నాగ్.. 'బ్రహ్మాస్త్ర' సినిమాతో చాలా గ్యాప్ తర్వాత బాలీవుడ్ లో ఎంట్రీ ఇస్తున్నారు. ఈ క్రమంలో ప్రస్తుతం ''ఘోస్ట్'' అనే చిత్రంలో నటిస్తున్నారు.

'PSV గరుడవేగ' ఫేమ్ ప్రవీణ్ సత్తారు దర్శకత్వంలో హై ఆక్టేన్ యాక్షన్ థ్రిల్లర్ గా ''ఘోస్ట్'' మూవీ తెరకెక్కుతోంది. ఇందులో నాగార్జున 'రా' ఏజెంట్ గా.. యాక్షన్ ప్యాక్డ్ రోల్ లో కనిపించబోతున్నారు. ఇప్పటికే విడుదలైన టైటిల్ అండ్ ఫస్ట్ లుక్ మోషన్ పోస్టర్ విశేష స్పందన తెచ్చుకుంది.

ప్రస్తుతం 'ఘోస్ట్' షూటింగ్ షెడ్యూల్ దుబాయ్ లో జరుగుతోంది. ఇందులో నాగ్ తో పాటుగా హీరోయిన్ సోనాలి చౌహన్ కూడా పాల్గొంటోంది. అక్కడ ఓ ఎడారి ప్రాంతంలో నాగార్జునతో యాక్షన్ సన్నివేశాలను చిత్రీకరిస్తున్నారు. 60 ఏళ్ల వయసులో నాగ్ ఎలాంటి డూప్ లేకుండా బైక్ ఛేజింగ్ సీన్స్ చేయడం విశేషం.

అయితే సూపర్ సీనియర్ స్టార్ హీరోలంతా ఇప్పుడు పాపులర్ డైరెక్టర్స్ తో యాక్షన్ సినిమాలు సెట్ చేసుకుంటుంటే.. నాగ్ మాత్రం అప్ కమింగ్ దర్శకులకి ఛాన్స్ లు ఇస్తూ డిఫరెంట్ స్క్రిప్ట్స్ ఎంచుకుంటున్నాడు. ఇప్పుడు ప్రవీణ్ సత్తారు తో చేస్తున్న ''ఘోస్ట్'' కూడా అలాంటి సినిమానే.

నిజానికి నాగార్జున తన మూడు దశాబ్దాల సినీ ప్రయాణంలో ఎన్నో విభిన్నమైన చిత్రాలు విలక్షణమైన పాత్రలతో మెప్పిస్తూ ట్రెండ్ సెట్టర్ గా నిలిచారు. అగ్ర దర్శకుల వెంట పరుగులు తీయకుండా.. ఇండస్ట్రీకి ఎంతోమంది కొత్తవాళ్లను పరిచయం చేసి సెల్యులాయిడ్ సైంటిస్ట్ అనిపించుకున్నారు.

ఇప్పుడు స్టార్ హీరోలందరూ కొత్తవారితో సినిమాలు చేయడానికి ఆలోచిస్తుంటే.. నాగార్జున మాత్రం యంగ్ టాలెంట్ ని ఎంకరేజ్ చేయడానికి కృషి చేస్తున్నారు. ఈ క్రమంలో పరాజయాలు ఎదురైనా వెనకడుగు వేయడం లేదు. ఫ్యాన్స్ మాత్రం స్టార్ డైరెక్టర్స్ తో ప్రాజెక్ట్ సెట్ చేయాలని కోరుతున్నారు.

ఏదేమైనా నాగార్జునకు ఇప్పుడు సోలో బ్లాక్ బస్టర్ కావాలి. ''ఘోస్ట్'' సినిమా కచ్చితంగా అలాంటి సక్సెస్ అందిస్తుందని అక్కినేని అభిమానులు భావిస్తున్నారు. ఏం జరుగుతుందో చూడాలి.

'ఘోస్ట్' చిత్రాన్ని సోనాలి నారంగ్ సమర్పణలో శ్రీ వెంకటేశ్వర సినిమాస్ ఎల్ఎల్పి మరియు నార్త్ స్టార్ ఎంటర్టైన్మెంట్ ప్రై.లి బ్యానర్స్ పై నారాయణ్ దాస్ కె నారంగ్ - పుష్కర్ రామ్మోహనరావు - శరత్ మరార్ సంయుక్తంగా నిర్మిస్తున్నారు.

ఇందులో గుల్ పనాంగ్ - అనైకా సురేంద్రన్ కీలక పాత్రల్లో నటిస్తున్నారు. ఈ చిత్రానికి ముఖేష్.జి సినిమాటోగ్రఫీ అందిస్తుండగా.. బ్రహ్మ కడలి ఆర్ట్ డైరెక్టర్ గా వర్క్ చేస్తున్నారు. రాబిన్ సుబ్బు మరియు నభా మాస్టర్ యాక్షన్ కొరియోగ్రఫీ చేస్తున్నారు.