అజిత్ సినిమాలో ఆ డాటర్ కేమియో

విశ్వనటుడు కమల్ హాసన్ కూతుళ్లిద్దరూ సినిమా రంగంలో దూసుకుపోతున్న విషయం తెలిసిందే. పెద్ద కూతురు శృతి హాసన్ ఇప్పటికే టాలీవుడ్ - కోలీవుడ్ - బాలీవుడ్ లను ఏలేస్తుంటే.. అక్షర హాసన్ ఇంకా ప్రయత్నాల స్టేజ్ లోనే ఉంది. మొదటి సినిమానే బాలీవుడ్ లో షమితాబ్ అంటూ ప్రయత్నించి ఫెయిల్యూర్ ను మూట కట్టుకుంది. ఓ ఫ్లాప్ వచ్చిందని బాధపడిపోయి సినిమాలకు దూరమైపోతే.. కమల్ కూతురు ఎలా అవుతుంది?

ప్రస్తుతం కమల్ హాసన్.. శృతి హాసన్ లు తండ్రీ కూతుళ్లుగా కలిసి కనిపించనున్న సినిమా శభాష్ నాయుడులో.. అక్షర హాసన్ కు కూడా భాగం ఉంది. ఈ చిత్రానికి అసిస్టెంట్ డైరెక్టర్లలో ఒకరు అక్షర హాసన్. ఇప్పడీ చిన్నది తల57లో ఓ కీలక పాత్ర పోషించనున్నట్లు తెలుస్తోంది. అజిత్ హీరోగా 57వ సినిమా రీసెంట్ గానే ప్రారంభమైంది. ఇందులో కాజల్ అగర్వాల్ మెయిన్ హీరోయిన్ కాగా.. ఈ మూవీలో అక్షర హాసన్ ఓ ప్రత్యేక రోల్ లో కనిపించనుంది.

శౌర్యం శివ దర్శకత్వంలో తెరకెక్కనున్న ఈ చిత్రంలో అక్షర చేస్తున్నది కేమియో మాత్రమే. అయినా సరే.. సినిమాలో ఈ రోల్ సంథింగ్ స్పెషల్ గా ఉంటుందని అంటున్నారు. ఇటు యాక్ట్రెస్ గాను.. అటు డైరెక్షన్ డిపార్ట్ మెంట్ లోనూ రెండు వైపులా పదునున్న కత్తిలా మారేట్లుగా ఉంది కమల్ చిన్న కూతురు అక్షర హాసన్.