యష్ రాజ్ ఫిలిమ్స్.. అక్షయ్.. ఓ భారీ ప్రాజెక్ట్

బాలీవుడ్ స్టార్ హీరోయిన్ అక్షయ్ కుమార్ స్పీడు మామూలుగా ఉండదు. అందరూ హీరోలు ఏడాదికి ఒక సినిమా చేయడానికి కష్టపడుతుంటే అక్షయ్ ఏడాదికి మూడు నాలుగు సినిమాలు అవలీలగా చేసేస్తాడు. పోనీ కంటెంట్ విషయంలో ఏమైనా రాజీపడతాడా అనుకుంటే ఊహు.. లేదు. రీసెంట్ గా 'మిషన్ మంగళ్' సినిమాతో మెప్పించిన అక్షయ్ ప్రస్తుతం నాలుగు సినిమాల్లో నటిస్తున్నాడు.. ఆ నాలుగు 'హౌస్ ఫుల్ 4'.. 'గుడ్ న్యూస్'.. 'లక్ష్మి బాంబ్'.. 'సుర్యవంశి'. తాజాగా అక్షయ్ నటించే మరో కొత్త సినిమా ప్రకటన వచ్చింది.

ఈరోజు అక్షయ్ కుమార్ జన్మదినం. ఈ సందర్భంగా అక్షయ్ తన కొత్త సినిమా 'పృథ్వీరాజ్' ను ప్రకటించాడు. అక్షయ్ కుమార్ తన ఇన్స్టా ఖాతా ద్వారా ఈ సినిమా టైటిల్ లోగో పోస్టర్ ను షేర్ చేస్తూ "నా పుట్టిన రోజు సందర్భం గా నా మొదటి హిస్టారికల్ చిత్రానికి సంబంధించిన వార్తను మీతో షేర్ చేసుకుంటున్నందుకు సంతోషిస్తున్నాను. సామ్రాట్ పృథ్వీరాజ్ చౌహాన్ లాంటి మహారాజు పాత్ర పోషించడం నాకు ఎంతో గౌరవం. ఆయన వీరత్వం.. విలువలు సాటిలేనివి" అంటూ క్యాప్షన్ ఇచ్చారు.

ఈ సినిమాకు చంద్ర ప్రకాష్ ద్వివేది దర్శకత్వం వహిస్తున్నారని.. ఈ భారీ చిత్రాన్ని యష్రాజ్ ఫిలిమ్స్ వారు నిర్మిస్తున్నాని.. వచ్చే ఏడాది దీపావళికి ఈ చిత్రం రిలీజ్ అవుతుందని కూడా అక్షయ్ వెల్లడించాడు. భారతదేశ చరిత్రలో పృథ్వీరాజ్ చౌహాన్ కు ఒక ప్రత్యేకమైన స్థానం ఉంది. అయన వీరత్వం గురించి కథలుకథలుగా చెప్పుకుంటారు. మరి ఇలాంటి పాత్రలో నటించేందుకు అక్షయ్ సిద్ధమయ్యాడంటే మరోసారి ఆయన బాక్స్ ఆఫీస్ హిట్టుకు తత్కాల్ టికెట్ బుక్ చేసుకున్నట్టే!