2.0’ లేనట్లే.. వాళ్లు డేట్ లాక్ చేశారు

రజినీకాంత్-శంకర్ కాంబినేషన్లో తెరకెక్కుతున్న విజువల్ వండర్ ‘2.0’ కోసం వేసవి దాకా ఆగక తప్పదేమో. ‘2.0’ ముందు అనుకున్నట్లుగా జనవరి 25న విడుదల కాదని దాదాపుగా తేలిపోయినట్లే. ‘2.0’ వాయిదా వార్తలు బయటికి వచ్చి మూణ్నాలుగు వారాలు కావస్తున్నా ఇప్పటిదాకా చిత్ర బృందం నుంచి ఎలాంటి ఖండన కానీ.. మరో ప్రకటన కానీ ఏమీ లేదు. విడుదలకు 2 నెలలే సమయం ఉండగా.. తదుపరి ప్రచార కార్యక్రమాలేమీ కనిపించట్లేదు. ఈ నెలలో హైదరాబాద్ వేదికగా టీజర్ లాంచ్ ఉంటుందని గతంలో ప్రకటించిన చిత్ర బృందం.. అలాంటి ఈవెంట్ ఏమీ చేయబోతున్నట్లు సంకేతాలు ఇవ్వట్లేదు. దీంతో ‘2.0’ వాయిదా పక్కా అని దాదాపుగా తేలిపోయినట్లే.

‘2.0’ జనవరి 25కు రాదని ఆ చిత్రంలో కీలక పాత్ర పోషించిన అక్షయ్ కుమార్ కు కూడా స్పష్టత వచ్చేసినట్లుంది. తాను హీరోగా నటిస్తూ స్వీయ నిర్మాణంలో తెరకెక్కిస్తున్న ‘ప్యాడ్‌ మ్యాన్’ సినిమా రిలీజ్ డేట్‌ ను అధికారికంగా ప్రకటించేశాడు. జనవరి 26న ఈ చిత్రం రిలీజవుతుందన్నాడు. సీనియర్ దర్శకుడు ఆర్.బాల్కి దర్శకత్వంలో తెరకెక్కుతున్న ఈ చిత్రంలో అక్షయ్ ఒక సామాన్యుడి పాత్ర పోషిస్తున్నాడు. అనిల్ కపూర్ తనయురాలు సోనమ్ కపూర్ అక్షయ్‌ కు జోడీగా నటిస్తోంది. ఈ చిత్ర పోస్టర్లు భలే ఆసక్తి రేకెత్తిస్తున్నాయి. త్వరలోనే ఈ చిత్ర ట్రైలర్ లాంచ్ చేయబోతున్నారు. ఈ ఏడాది ‘ఎయిర్ లిఫ్ట్’ - ‘జాలీ ఎల్‌ ఎల్‌ బీ-2’, ‘టాయిలెట్: ఏక్ ప్రేమ్ కథ’ లాంటి సూపర్ హిట్లతో ఊపుమీదున్నాడు అక్షయ్. వచ్చే ఏడాది కూడా అతను ‘ప్యాడ్‌ మ్యాన్’తో శుభారాంభం చేస్తాడేమో చూడాలి.