అక్షయ్ కుమార్ సెన్సేషనల్ సినిమా

గత కొన్నేళ్లలో విలక్షణమైన పాత్రలు.. భిన్నమైన సినిమాలతో తన ఇమేజ్ ఎంతో పెంచుకున్నాడు అక్షయ్ కుమార్. ఈ ఏడాది అక్షయ్ నుంచి ‘ఎయిర్ లిఫ్ట్’.. ‘జాలీ ఎల్ఎల్బీ-2’.. ‘టాయిలెట్: ఏక్ ప్రేమ్ కథ’ మంచి విజయం సాధించాయి. అక్షయ్ కు చాలా మంచి పేరు తెచ్చిపెట్టాయి. గణతంత్ర దినోత్సవ కానుకగా రాబోతున్న అక్షయ్ కొత్త సినిమా ‘ప్యాడ్ మ్యాన్’ కూడా ఆసక్తి రేకెత్తిస్తోంది. మహిళలు రుతుక్రమం సమయంలో వాడే ప్యాడ్‌ల నేపథ్యంలో ఈ సినిమా సాగడం విశేషం. దీని ట్రైలర్ ఇప్పటికే సెన్సేషన్ క్రియేట్ చేసింది. దీని తర్వాత అక్షయ్ మరో సెన్సేషనల్ మూవీతో రాబోతున్నాడు. అదే.. కేసరి.

భారత దేశ చరిత్రలో ప్రత్యేకంగా చెప్పుకునే ‘బ్యాటిల్ ఆఫ్ సరాగరి’ నేపథ్యంలో నడిచే సినిమా ‘కేసరి’. 1897లో భారత దేశ ఈశాన్య ప్రాంత సరిహద్దుల్లో 10 వేల మంది అఫ్గాన్ సైనికులకు.. 21 మంది సిక్కు సైనికులకు మధ్య భీకర పోరాటం జరిగింది. ఆ 21 మంది సిక్కు సైనికులు.. ఏకంగా 600 మందికి పైగా అఫ్గాన్ సైనికుల్ని మట్టుబెట్టారు. చివరికి వాళ్లు కూడా చనిపోయారు. వారి అసాధారణ పోరాటం చరిత్రలో నిలిచిపోయింది. ఈ యుద్ధం నేపథ్యంలో ‘కేసరి’ సినిమా నడుస్తుంది. ఈ 21 మంది సిక్కు సైనికుల్లో నాయకుడిగా నిలిచిన వ్యక్తి పాత్రను అక్షయ్ పోషిస్తున్నాడు. గుబురు గడ్డంతో.. నెత్తిన తలపాగా ధరించిన అక్షయ్ కుమార్ ఫస్ట్ లుక్ ను ఈ రోజు రిలీజ్ చేశారు. షూటింగ్ ఇప్పుడే మొదలవుతోంది. అనురాగ్ సింగ్ దర్శకత్వంలో తెరకెక్కబోయే ఈ చిత్రాన్ని ప్రముఖ నిర్మాత కరణ్ జోహార్ ప్రొడ్యూస్ చేయబోతున్నాడు.