2.ఓ : రేపు ప్రపంచం కొత్తగా మారబోతుంది

ఇండియాలో మరి కొన్ని గంటల్లో 2.ఓ సునామి మొదలు కాబోతుంది. ఇప్పటికే వచ్చిన సునామి హెచ్చరిక (టీజర్‌ - ట్రైలర్‌) లు రేపు రాబోతున్న 2.ఓ సునామి ఏ స్థాయిలో ఉండబోతుందో చెప్పకనే చెప్పాయి. ఈ సునామికి ఇప్పటి వరకు వచ్చిన ఇండియన్‌ సినిమాల రికార్డులన్నీ కొట్టుకు పోతాయంటూ అంతా నమ్మకంగా ఉన్నారు. ఇక ఈ చిత్రంలో రజినీకాంత్‌ కంటే ఎక్కువగా అక్షయ్‌ కుమార్‌ పాత్ర పై ప్రేక్షకుల్లో అంచనాలు ఉన్నాయి. రోబో చూసిన ప్రేక్షకులకు రజినీకాంత్‌ పాత్ర ఏంటీ, ఎలా ఉంటుందనే విషయంపై ఒక అవగాహణ ఉంది. కాని అక్షయ్‌ కుమార్‌ పాత్ర ఏంటీ అనేది మాత్రం చాలా సస్పెన్స్‌ గా ఉంది.

టీజర్‌ - ట్రైలర్‌ - పోస్టర్స్‌ చూస్తూ ఉంటే ఆయన భయంకరమైన రూపం కనిపిస్తుంది, కాని పాత్ర ఏంటీ అనేది మాత్రం ఒక అంచనాకు రాలేక పోతున్నాం. సినిమా విడుదల మరికొన్ని గంటలు ఉన్న సమయంలో అక్షయ్‌ కుమార్‌ మరో పోస్టర్‌ ను పోస్ట్‌ చేసి, తన పాత్ర ఏ స్థాయిలో ఉంటుందో చెప్పే ప్రయత్నం చేశాడు. తాజా పోస్టర్‌ లో అక్షయ్‌ కుమార్‌ కాకి రూపంలో ఉన్న మనిషిలా కనిపిస్తున్నాడు. రాక్షస కాకిలా ఉన్న అక్షయ్‌ కి అడ్డుకునేందుకు కింద ఆర్మీ వారు తుపాకులు ఎక్కు పెట్టడంతో పాటు, బాంబులు సంధిస్తున్నారు. ఇది క్లైమాక్స్‌ లో వచ్చే సీన్‌ అయ్యి ఉంటుందనిపిస్తుంది.

ఈ పోస్టర్‌ తో పాటు అక్షయ్‌ కుమార్‌ ఇన్‌ స్టాగ్రామ్‌ లో... రేపు ప్రపంచం మారబోతుంది, మన ప్రపంచం కొత్తగా ప్రారంభం కానుంది, 3డి అద్బుతం రేపు రాబోతుంది, మన రాతలు పూర్తిగా మారబోతున్నాయి అంటూ పోస్ట్‌ చేశాడు. రజినీ పాత్ర రోటీన్‌ గా ఉండబోతుందని ఇప్పకే అర్థం అయ్యింది. అక్షయ్‌ పాత్ర అయినా ఆకట్టుకుంటేనే ఈ చిత్రం అనుకున్న స్థాయికి చేరుతుందని, లేదంటే రికార్డుల బద్దలు కష్టమే అనే అభిప్రాయం వ్యక్తం అవుతోంది. 600 కోట్ల బడ్జెట్‌ మూవీ భవితవ్యం మరి కొన్ని గంటల్లోనే తేలిపోనుంది.