ఐమ్యాక్స్ వెర్ష‌న్‌ లో హాకీ మూవీ

కిలాడీ అక్ష‌య్ కుమార్ ఖాన్‌ ల‌కే ముచ్చెమ‌ట‌లు ప‌ట్టిస్తూ వ‌రుస విజ‌యాల‌తో దూసుకుపోతున్న సంగ‌తి తెలిసిందే. అత‌డి స‌క్సెస్ రేటుకు - ఆర్జ‌న‌కు ఫోర్బ్స్ జాబితానే త‌ల‌వొంచింది. ఖాన్‌ల‌ను రేసులోంచి వెన‌క్కి నెట్టి అక్కీ పేరును టాప్ ఎర్న‌ర్స్ జాబితాలో చేర్చింది. అందుకే అక్ష‌య్ న‌టించిన గోల్డ్ రిలీజ‌వుతోంది అన‌గానే ఒక‌టే ఉత్కంఠ‌. టాయ్‌ లెట్‌ - ప్యాడ్‌ మ్యాన్ వంటి ఘ‌న‌విజ‌యాల త‌ర్వాత అక్ష‌య్ న‌టించిన ఈ సినిమా మ‌రో బ్లాక్‌ బ‌స్ట‌ర్ కొడుతుంద‌ని అంచ‌నా వేస్తున్నారు.

గోల్డ్ అత్యంత ప్ర‌తిష్ఠాత్మ‌కంగా ఈనెల 15న స్వాతంత్య్ర దినోత్స‌వ కానుక‌గా రిలీజ‌వుతోంది. హాకీ నేప‌థ్యంలో తెర‌కెక్కిన ఈ సినిమాలో అక్ష‌య్ మెరుపులు వీక్షించాల‌న్న ఉత్కంఠ అభిమానుల్లో ఉంది. అందుకే ప్ర‌స్తుతం ఈ సినిమా కోసం స‌ర్వ‌త్రా ఆస‌క్తిగా ఎదురు చూస్తున్నారు. వ‌రుస స‌క్సెస్‌ల‌తో జోరుమీదున్న అక్కీ.. మ‌రో బ్లాక్ బ‌స్ట‌ర్ ప‌ట్టేస్తాడా? అంటూ మార్కెట్ వ‌ర్గాల్లో ఇప్ప‌టికే ఎవ‌రికి వారు లెక్క‌ల్లో మునిగి తేల్తున్నారు. దీనికి అద‌న‌పు బూస్ట్‌ నిస్తూ ఈ సినిమాని ఐమ్యాక్స్ వెర్ష‌న్‌ లో రిలీజ్ చేయ‌నున్నార‌ని ప్ర‌ఖ్యాత క్రిటిక్ త‌ర‌ణ్ ఆద‌ర్శ్ ప్ర‌క‌టించారు. అధికారికంగా చిత్ర‌యూనిట్ ఈ విష‌యాన్ని వెల్ల‌డించ‌నుంద‌ని తెలిపారు. ఐమ్యాక్స్ వెర్ష‌న్ అంటే ఈ సినిమాని 3డిలో తెర‌కెక్కించారా? అంటూ చ‌ర్చ సాగుతోంది. క్రీడా నేపథ్యం సినిమా.. పైగా స్వ‌తంత్య్ర భార‌తావ‌నిలో తొలి గోల్డ్ మెడ‌ల్ సాధించిన హాకీ టీమ్‌ ని తెర‌పై ఆవిష్క‌రిస్తున్నారు. చ‌క్ దే ఇండియా త‌ర‌హాలో ఈ చిత్రం ఆద్యంతం ర‌క్తి క‌ట్టిస్తే కిలాడీకి మ‌రో బ్లాక్‌ బ‌స్ట‌ర్ ప‌డిన‌ట్టే! ఈ సినిమా రిలీజవుతున్న అన్ని థియేట‌ర్ల‌లోనూ ర‌జ‌నీకాంత్- శంక‌ర్‌ ల 2.ఓ టీజ‌ర్ రిలీజ‌వుతుండ‌డం మ‌రో ఇంట్రెస్టింగ్ ఎలిమెంట్‌.