నాలా చేయొద్దంటున్న స్టార్ హీరో

బాలీవుడ్ లో వయసుతో నిమిత్తం లేకుండా రిస్కీ పాత్రలకు ఎప్పుడూ సై అనే అక్షయ్ కుమార్ కొత్త సినిమా సూర్యవంశీ శరవేగంగా షూటింగ్ జరుపుకుంటోంది. గత ఏడాది టెంపర్ రీమేక్ సింబాతో మరో బ్లాక్ బస్టర్ తన ఖాతాలో వేసుకున్న రోహిత్ శెట్టి దీనికి దర్శకుడు. తమిళ్ తో పాటు తెలుగులోనూ మంచి విజయం సాధించిన కార్తీ ఖాకీ ఆధారంగా ఇది రూపొందుతోందని టాక్ ఉంది.

దీని షూట్ సందర్భంగా ఓ రిస్కీ ఫోటో షేర్ చేశాడు అక్షయ్. రన్నింగ్ హెలికాఫ్టర్ మీద నేలకు కేవలం కొన్ని అడుగుల ఎత్తులో వేలాడుతూ రోహిత్ ని ఛేజ్ చేసే సీన్ ని పోస్ట్ చేశాడు. నిజంగానే అభిమానులు భయపడేలా ఉన్న ఆ షాట్ ని ఎవరూ ఇమిటేట్ చేయొద్దని నిపుణుల పర్యవేక్షణలో చేశాను కాబట్టి దీన్ని చూసి ప్రమాదం కొనితెచ్చుకోవద్దని హెచ్చరించాడు

సూర్యవంశీలో సిన్సియర్ పోలీస్ ఆఫీసర్ గా అక్షయ్ కనిపించనున్నాడు. కరుడుగట్టిన బందిపోటు దొంగలను పట్టుకునే మిషన్ లో ప్రాణాలకు సైతం తెగించే పాత్రలో చాలా టెర్రిఫిక్ గా చేశాడట. అన్నట్టు దీని రిలీజ్ డేట్ కి ఓ విశేషం ఉంది. రాజమౌళి మల్టీ స్టారర్ విడుదల తేది 2020 జూలై 31నే దీన్ని కూడా ఫిక్స్ చేశారు.

ఇప్పటి దాకా ఎలాంటి మార్పు ప్రకటించలేదు. ఆర్ఆర్ఆర్ లాంటి గ్రాండియర్ కే పోటీ సై అన్నారంటే తమ సినిమా మీద గట్టి నమ్మకమే ఉందన్న మాట. ఏదైనా మార్పు జరిగినా ఆశ్చర్యం లేదు. దానికి ఇంకా చాలా టైం ఉంది కాబట్టి ప్రస్తుతానికి ఆర్ఆర్ఆర్ అపోజిషన్ నార్త్ లో ఈ సూర్యవంశినే.