ఓటీటీలో రిలీజ్ కాబోతున్న బాలీవుడ్ స్టార్ హీరో సినిమా..!

ప్రస్తుతం డిజిటల్ ఫ్లాట్ ఫార్మ్స్ హవా నడుస్తోందని చెప్పవచ్చు. లాక్ డౌన్ సమయంలో ఓటీటీ ప్లాట్ ఫార్మ్స్ బాగా పుంజుకున్నాయి. ఓటీటీలకు భారీగా సబ్ స్క్రైబర్ల సంఖ్య పెరగడంతో పాటు భారీ వ్యూయర్ షిప్ వస్తోంది. పరిస్థితులను బట్టి చూస్తే ఇకపై సినిమాలన్నీ థియేటర్లలో కాకుండా డైరెక్ట్ ఓటీటీలలో రిలీజ్ చేసే అవకాశాలు ఎక్కువగా ఉన్నాయి. ఇప్పటికే కరోనా మహమ్మారి కారణంగా ఏర్పడ్డ లాక్ డౌన్‌ తో థియేటర్స్ - మల్టీప్లెక్స్ అన్నీ మూత పడ్డాయి. థియేటర్స్ పూర్తిగా మూసేయడంతో డిస్ట్రిబ్యూట‌ర్స్ - బ‌య్య‌ర్స్ - థియేట‌ర్స్ నిర్వాహ‌కులు తీవ్ర గ‌డ్డుకాలాన్ని ఎద‌ర్కొంటున్నారు. కరోనా ఎఫెక్ట్ ఎప్పటివరకు కొనసాగుతుందో తెలియని పరిస్థితి.. ఒకవేళ కరోనా కంట్రోలై లాక్ డౌన్ ఎత్తేసినా కూడా జనాలు సినిమా థియేటర్స్‌ ఒకప్పటిలా వచ్చి ఎగబడి సినిమా చూసే పరిస్థితి ఎంతవరకు ఉంటుందో తెలియదు. అయితే ఒక సినిమా అనుకున్న సమయానికి విడుదల కాకపోతే నిర్మాతలు తీవ్ర నష్టాలను ఎదుర్కోవాల్సి వస్తుంది.

సినిమాల కోసం ఫైనాన్సియర్ల దగ్గర డబ్బులు తీసుకున్న కొందరు నిర్మాతలు వడ్డీలు కట్టలేక చాలా ఇబ్బందులకు గురవుతున్నారట. దీంతో ఈ నష్టాల నుంచి.. ఈ పరిస్థితి నుంచి ఎలా గట్టెక్కాలా అని ఇండస్ట్రీ పెద్దలు తీవ్రంగా ఆలోచిస్తున్నారు. ఈ నేపథ్యంలో ఇప్పటికే షూటింగ్ పూర్తయిన సినిమాలను ఓటీటీ ప్లాట్ ఫార్మ్స్ ద్వారా రిలీజ్ చేయాలని కొందరు నిర్మాతలు భావిస్తున్నారట. అయితే కొందరు నిర్మాలు ఇందుకు అంగీకరిస్తుండగా.. కొందరు మాత్రం ఒప్పుకోవడం లేదు. ఇప్పటికే తెలుగులో అమృతరామమ్ అనే సినిమా థియేటర్‌లో రిలీజ్ కాకుండా డెరెక్ట్‌ గా ఓటీటీలో విడుదలయ్యేందుకు సిద్ధమైంది. అయితే వీటితో పాటు బాలీవుడ్ స్టార్ హీరో అక్షయ్ కుమార్ నటించిన ఓ చిత్రాన్ని కూడా ఓటీటీలో విడుదల చేయబోతున్నట్టు సమాచారం.

రాఘవ లారెన్స్ హీరోగా నటించిన సూపర్ హిట్ చిత్రం ‘కాంచన’ సినిమాను బాలీవుడ్‌లో ‘లక్ష్మీ బాంబ్’ అనే పేరుతో తెరకెక్కిస్తున్న విషయం తెలిసిందే. అక్షయ్ కుమార్ హీరోగా నటిస్తున్న ఈ సినిమాకు లారెన్స్ దర్శకత్వం వహిస్తుండగా.. కియారా అడ్వానీ హీరోయిన్‌ గా నటిస్తోంది. ఈ సినిమాని ఈద్ సందర్భంగా మే 22న విడుదల చేయాలని మేకర్స్ భావించినప్పటికీ ఈ కరోనా వల్ల అది సాధ్యపడేలా కనిపించడం లేదు. ఈ నేప‌థ్యంలో డిస్నీ మరియు హాట్ స్టార్స్ లో ల‌క్ష్మీ బాంబ్ చిత్రం రిలీజ్ చేయాల‌ని అనుకుంటున్నార‌ట‌. ఇప్ప‌టికే మేక‌ర్స్ డిస్నీ హాట్ స్టార్ వారితో సంప్ర‌దింపులు కూడా జ‌రిపిన‌ట్టు తెలుస్తుంది. ఇప్పటికే ఈ సినిమా ఎడిటింగ్, బ్యాక్‌గ్రౌండ్ మ్యూజిక్, మిక్సింగ్, వీఎఫ్‌ఎక్స్ పూర్తయినట్లు తెలుస్తోంది. కొంత పోస్ట్ ప్రొడ‌క్ష‌న్ మిగిలి ఉండగా వీలైనంత త్వ‌ర‌గా పూర్తి చేసి జూన్ నెలలో ఈ సినిమాను విడుదల చేద్దామని బృందం భావిస్తున్నారట. ఒకవేళ ఈ సినిమాని ఓటీటీ ప్లాట్ ఫాంలో రిలీజ్ చేస్తే మాత్రం డైరెక్ట్ గా డిజిటల్ లో రిలీజ్ కాబోతున్న పెద్ద సినిమాగా, స్టార్ హీరో సినిమాగా నిలిచిపోతుంది. మరి ఇది ఎంత వరకు సాధ్యం అవుతుంది అనేది చూడాలి.