శంకర్ విలన్ కూడా భయపడతాడా?

దర్శకుడు శంకర్ సినిమాల్లో విలన్స్ ఎంతటి నిర్దాక్షిణ్యంగా ఉంటారో ఇప్పటికే పలు మార్లు చూశాం. ప్రస్తుతం శంకర్ తెరకెక్కిస్తున్న మూవీ 2.ఓ లో విలన్ గా బాలీవుడ్ హీరో అక్షయ్ కుమార్ నటిస్తున్న సంగతి తెలిసిందే. ఇప్పటికే షూటింగ్ పూర్తి చేసుకుని.. పోస్ట్ ప్రొడక్షన్ పనుల దశలో ఉండగా.. ఇప్పుడు ఓ తమిళ్ రీమేక్ చిత్రానికి సై అన్నాడట అక్షయ్ కుమార్.

రాఘవ లారెన్స్ ప్రధాన పాత్రలో నటించిన కాంచన సిరీస్ మూవీస్ ఎంతగా సక్సెస్ సాధిస్తున్నాయో చూస్తున్నాం. డబ్బింగ్ అవుతున్న అన్ని భాషలలోనూ ఈ చిత్రాలకు ఆదరణ దక్కుతోంది. ఈ సిరీస్ లో కాంచన2 ను.. హిందీలో రీమేక్ చేయాలని ఫిక్స్ అయ్యాడట అక్షయ్ కుమార్. ఇక్కడ అంటే లారెన్స్ కాబట్టి.. ఎక్కువ సేపు పిరికివాడిగా భయపడి.. కాసేపు భయపెట్టి.. మనల్ని నవ్విస్తూనే వణికేంచుకు గట్టిగానే ట్రై చేశాడు. హిట్స్ కొట్టేశాడు. ఇప్పుడు ఇదే పాత్రలో అక్షయ్ కుమార్ కనిపించనున్నాడన్న మాట.

ఒకవైపు శంకర్ సినిమాలో విలన్ గా రోబోలను కూడా వణికించబోతున్న అక్షయ్ కుమార్.. ఓ హారర్ కామెడీ కం మెసేజ్ ఓరియెంటెడ్ మూవీతో అలరించేందుకు ఫిక్స్ కావడం విశేషం. ఈ హీరోకు హారర్ సినిమాలు కొత్తేమీ కాదు. చంద్రముఖి హిందీ రీమేక్ లో రజినీ పాత్రను పోషించిన హీరో అక్షయ్. ప్రస్తుతం ఈ హీరో తగ్గ విధంగా కథ మారకుండా కథనంలో మార్పులు చేస్తున్నట్లు తెలుస్తోంది.