సర్దార్ ఆడియో: ఆలీ స్టేజ్ ఎక్కాడోచ్

ఓ వివాదం కారణంగా.. ఆలీ స్టేజ్ మీద మాట్లాడ్డం మానేశాడు. ఎంతమంది పిలిచినా.. వేదికపై ఎక్కి మాట్లాడేందుకు నిరాకరించిన ఆలీ.. ఇప్పుడు పవన్ కోసం మాత్రం తన పట్టు వదిలేశాడు. సర్దార్ గబ్బర్ సింగ్ ఆడియో వేడుకలో.. సేం టు సేమ్ పవన్ గెటప్ లో స్టేజ్ పై ఎంట్రీ ఇచ్చాడు ఆలీ.

స్టేజ్ పైకి వస్తూ వస్తూనే పంచ్ లు వేసేశాడు. తన చేతిలో ఉన్న డబుల్ బ్యారెల్ గన్ చూపిస్తూ.. ఇందులో రెండు బుల్లెట్లు ఉంటాయని.. ఒక బుల్లెట్ పవర్ స్టార్ -ఒక బుల్లెట్ మెగా స్టార్ అయితే.. ఆరడుగుల బుల్లెట్ తానే అని చెప్పడంతో ఆడిటోరియం అంతా నవ్వులు పండాయి. పవన్ కి ఆలీకి ఎంతో ఫ్రెండ్ షిప్ కారణంగానే.. తన పట్టు వదిలేశాడని చెప్పాలి.

అలాగే.. సర్దార్ కి సంబంధించిన ఓ సీక్రెట్ కూడా విప్పేశాడు ఆలీ. 'ఇందులో పవన్ ఓ స్టెప్ వేశాడు. ఇంద్ర గుర్తుందా.. అందులో వీణ స్టెప్ గుర్తుందా. ఆ స్టెప్ వేయడానికి పొద్దున 9 నుంచి రాత్రి 2 అయింది. అప్పుడు వేశాడు పవన్ ఆ స్టెప్' అంటూ చిరు స్టెప్ ను పవన్ కళ్యాణ్ వేశాడన్న వార్తలను కన్ఫాం చేసేశాడు ఆలీ. అలాగే హిందీలో పవర్ తగ్గిందని.. అందుకే అక్కడ కూడా పవర్ చూపించేందుకు.. పవర్ స్టార్ వెళ్తున్నాడని, ఆవకాయ్ అన్నం పవర్ ఏంటో.. చపాతీలు తినేవాళ్లకు చూపించాలని చెప్పాడు ఆలీ.