కామెడీ కోసమే.. నొప్పించేందుకు కాదు - ఆలీ

ఆడియో ఫంక్షన్ లలో ఆలీ చేస్తున్న హంగామాకి మంచి రెస్పాన్సే వస్తున్నా.. ఒకోసారి జోకులు శృతి మించుతున్నాయనే విమర్శలున్నాయి. హీరోయిన్ల అంగాంగాలను అసభ్యంగా వర్ణిస్తున్నాడంటూ తిట్టిపోసే వాళ్లు కూడా ఉన్నారు. తోటి యాంకర్లతో డబుల్ మీనింగులు, డైరెక్టుగానే వర్ణనలతో ఫంక్షన్లలో డిగ్నిటీ చెడగొడుతున్నాడనే విమర్శలపై ఆలీ తొలిసారిగా నోరు విప్పాడు.

గతంలో తను యాంకరింగ్ చేసే ప్రోగ్రామ్ ల ద్వారా కౌంటర్స్ వేసిన ఆలీ.. ఇప్పుడు నేరుగానే నోరు విప్పాడు. సైజ్ జీరో ఫంక్షన్ లో అనుష్క తొడలను వర్ణించడం అనేది.. కేవలం ఆడియన్స్ నవ్వుకోవడానికే తప్ప.. వేరే ఉద్దేశ్యం లేదన్నాడు ఆలీ. సూపర్ సినిమాలో అనుష్క ఇవాళ పెద్ద హీరోయిన్ అయినా.. సూపర్ సినిమా ద్వారా ఇండస్ట్రీలో ప్రవేశించినప్పటి నుంచి తనకు తెలుసన్న ఆలీ.. పదిమంది నవ్వుకోవడం కోసం చేసిన వర్ణన, కామెంట్లలో తప్పు లేదంటున్నాడు.

ఆలీపై ఇదేం మొదటి వివాదం కాదు. సన్నాఫ్ సత్యమూర్తి ఆడియో ఫంక్షన్ లో సమంత నడుంపై ఇలాంటి కామెంట్సే చేయడంతో.. ఓ మహిళ యూట్యూబ్ ద్వారా చెడుగుడు ఆడేసుకుంది. దీనిపై కూడా స్పందించిన ఆలీ.. అసలు తనకేం తెలుసని ప్రశ్నించాడు. డాక్టరేట్ కొనుక్కున్నాడా అనే ప్రశ్నకు కూడా సమాధానమిచ్చాడు. 'నేను 350 సినిమాల్లో చేసినందుకు డాక్టరేట్ ఇవ్వలేదు. పదేళ్లుగా చేస్తున్న సేవా కార్యక్రమాలను గుర్తించి ఇచ్చారు. నాతో పాటు అవార్డ్ తీసుకున్నవాళ్లందరూ మేధావులు, వయోవృద్ధులే.' అన్నాడు.

మహిళల మనసు నొచ్చుకోవడంపై స్పందించిన ఆలీ '' ఇంతగా బాధ పడుతున్నారంంటే ఇంకోసారి ఇలా బహిరంగంగా.. హీరోయన్లను కాని వేరే నటీమణులను ఎవ్వరినీ కాని నేను కామెంట్‌ చేయబోను. మనస్సులు నొచ్చుకొని ఉంటే క్షమించండి'' అంటూ చెప్పుకొచ్చాడు ఆలీ.

ఎప్పుడూ నవ్వుతూ ఉండే ఆలీ.. సీరియస్ కామెంట్స్ ద్వారా... తనలోని కామెడీ కింగ్ లో మరో వేరియేషన్ చూపించేశాడు. మాటలు దాటవేసే ఈ కాలంలో.. కామెంట్ల మీద స్పందించడం ఆలీ కే చెల్లింది.