'బిగ్ బాస్' లోకి తిరిగొచ్చిన ఆ వ్యక్తి ఎవరంటే?

కొన్ని రోజులుగా ప్రచారంలో ఉన్న వార్తే నిజమైంది. ‘బిగ్ బాస్‌’ నుంచి కొన్ని వారాల కిందట ఎలిమినేట్ అయిన వ్యక్తి తిరిగి హౌస్‌ లోకి వచ్చాడు. ఆ వ్యక్తి మరెవరో కాదు.. అలీ రజానే. అతను బిగ్ బాస్‌ లోకి రీఎంట్రీ ఇస్తున్నాడని కొన్ని రోజులుగా ప్రచారం జరుగుతున్న సంగతి తెలిసిందే. గురువారం నాటి ఎపిసోడ్ లో అదే జరిగింది. ఎపిసోడ్ చివర్లో అదిరిపోయే స్టయిల్లో హౌస్‌ లోకి తిరిగి అడుగు పెట్టి హౌస్ మేట్స్‌ ను ఆశ్చర్యంలో - ఆనందంలో ముంచెత్తాడు అలీ. ఇంతకుముందు హౌస్‌ లోకి తొలిసారి ఎంట్రీ ఇచ్చినపుడు.. లోపల ఉన్నన్ని రోజులు తరచుగా బేర్ బాడీతో షో చేసిన అలీ.. రీఎంట్రీలోనూ అదే పని చేశాడు. హౌస్ మేట్స్ అందరూ ‘రేసుగుర్రం’ సినిమాలోని డౌన్ డౌన్ డుప్పా డుప్పా పాటకు డ్యాన్స్ చేస్తూ ఊగిపోతున్న సమయంలో ఫేస్‌ కు మాస్క్ వేసుకుని ఉన్నట్లుండి లోపలికి వచ్చాడు అలీ.

ముఖం కనిపించకపోయినా అలీ బాడీ చూడగానే అతనే అని అందరికీ అర్థమైపోయింది. అందరి ముఖాల్లో ఆనందం వెల్లివిరిసింది. శ్రీముఖి - రవికృష్ణ అయితే చాలా ఎగ్జైట్ అయిపోయారు. శ్రీముఖి అతడిని గట్టిగా కౌగిలించుకుంది. రవికృష్ణ అలీని ముద్దు పెట్టుకున్నాడు. ‘బిగ్ బాస్’ మూడో సీజన్ లో స్ట్రాంగ్ కంటెస్టంట్లలో ఒకడిగా కనిపించిన అలీ.. అనుకోని విధంగా గత నెల ఎలిమినేట్ అయిపోయాడు. ఐతే అలీ హౌస్‌ లో ఉండగా అతడికెంతో ఇష్టమైన మావయ్య చనిపోవడం - ఆ విషయాన్ని అలీకి చెప్పకుండా దాచడం.. ఇంటికి వెళ్లాక విషయం తెలిసి అతను చాలా ఎమోషనల్ అవుతూ సోషల్ మీడియాలో ఒక పోస్ట్ పెట్టడంతో అది చదివిన వాళ్ల కళ్లలో నీళ్లు తిరిగాయి. అలీ పట్ల సానుభూతి వ్యక్తమైంది. ఈ నేపథ్యంలో గత ఏడాది నూతన్ నాయుడిని తెచ్చినట్లే ఈసారి ఒకరిని హౌస్‌ లోకి తిరిగి తేవాలనుకున్నపుడు అలీనే మంచి ఛాయిస్ అని ‘బిగ్ బాస్’ నిర్వాహకులకు అనిపించి అతడిక ఛాన్స్ ఇచ్చారు. ఇదిలా ఉండగా హౌస్‌లో స్ట్రాంగ్ కంటెస్టెంట్లుగా ఉన్న వరుణ్ సందేశ్ - శ్రీముఖి - బాబా భాస్కర్ - రవికృష్ణ ఈ వారం ఎలిమినేషన్లో ఉన్నారు.