ఊహించని ఎలిమినేషన్..హౌస్‌ లో బ‌రువెక్కిన బాధ‌తో వీడ్కోలు

బిగ్ బాస్ హౌస్ నుంచి ఒకో వారం ఒకో సెలబ్రిటీ బయటకు వెళ్లిపోతున్న విషయం తెల్సిందే. అయితే ఆరోవారం ఎలిమినేషన్ కు బ్రేక్ పడిన...ఏడో వారం ఊహించని విధంగా అలీ ఎలిమినేట్ అయినట్లు నాగార్జున ప్రకటించారు. దీంతో ఇంట్లోని ప్రతి సభ్యుడు కన్నీటి పర్యంతమైపోయారు. శనివారం ఎలిమినేషన్ నుంచి రాహుల్ సేఫ్ అయిన విషయం తెలిసిందే. ఇక ఆదివారం ఎలిమినేషన్ లో ఉన్న రవి - అలీ - మహేశ్ - శ్రీముఖిలు ఉన్నారు. ఈ క్రమంలో మొదట శ్రీముఖి సేఫ్ అయినట్లు ప్రకటించిన నాగ్...మిగతా ముగ్గురులో అలీ ఎలిమినేట్ అయినట్లు ప్రకటించారు.

ఈ సారి ఎలిమినేష‌న్ డిఫ‌రెంట్‌ గా జ‌రిగింది. ముందుగా ఎలిమినేష‌న్‌ లో ఉన్న న‌లుగురిలో లైట్ ఎవ‌రిమీద ప‌డుతుందో ? వాళ్లు సేఫ్ అవుతార‌ని ప్ర‌క‌టించ‌గా లైట్ శ్రీముఖి మీద ప‌డింది. ఆ త‌ర్వాత ముగ్గురిలో లైట్ ఎవ‌రిమీద ప‌డుతుందో ? వాళ్లు ఎల‌మినేట్ అవుతార‌ని ప్ర‌క‌టించ‌గా లైట్ ఆలీపై ప‌డింది.

దీంతో ఇంటిలో అందరూ షాక్ లోకి వెళ్ళిపోయారు. చాలాసేపు వరకు వారు అలీ ఎలిమినేట్ అంటే నమ్మలేని స్టేజ్ లో ఉండిపోయారు. కానీ నాగ్ మరోసారి ఎలిమినేట్ అని చెప్పడంతో హౌస్ లో ఏడుపులు మొదలయ్యాయి.

ముఖ్యంగా అలీ ప‌దే ప‌దే త‌న‌కు చెల్లిగా చెప్పుకునే శివజ్యోతి గుక్క తిప్పకోకుండా ఏడుస్తూనే ఉంది. అటు శ్రీముఖి అలీకి ఎదురెళ్లి గట్టిగా పట్టుకుని ఏడ్చేసింది. ఆ తర్వాత అలీ శివజ్యోతిని హగ్ చేసుకుని చాలాసేపు ఓదార్చాడు. అటు ఎప్పుడు ఏడవని రాహుల్ కూడా అలీని హగ్ చేసుకుని ఏడ్చేశాడు. మొత్తంగా ఇంట్లో ప్రతి ఒక్కరూ కన్నీరు పెట్టుకున్నారు. ఆ తరవాత అందరి ఎమోషన్ మధ్య నుంచి అలీ ఇంట్లో నుంచి బయటికి వచ్చి నాగార్జునను కలిశాడు.

అయితే, ఇంటి సభ్యులతో మరోసారి మాట్లాడే అవకాశాన్ని అలీకి నాగార్జున ఇచ్చారు. టెలిఫోన్ బూత్ ఏర్పాటు చేసి దాని ద్వారా ఇంటి సభ్యులతో మాట్లాడించారు. చాలా మంది ఏడుస్తూనే అలీతో మాట్లాడారు. కానీ అందరితో నవ్వుతూ మాట్లాడిన అలీ.. బాబా భాస్కర్ మాట్లాడినప్పుడు మాత్రం ఎమోషన్‌ ను కంట్రోల్ చేసుకోలేకపోయాడు. తానూ కూడా ఫుల్ గా ఏడ్చేశాడు. మొత్తం మీద బయటికి సంతోషం నటిస్తూ గుండె నిండా బాధతో అలీ బిగ్ బాస్ షో నుంచి నిష్క్రమించాడు.