హీరోయిన్ని ఇంట్లోంచి గెంటేశారు

ఆమె ఓ పేరున్న బాలీవుడ్ సినిమాలో నటిస్తున్న హీరోయిన్. ఇమ్రాన్ హష్మి లాంటి ఫేమస్ హీరో పక్కన చేస్తోంది. అలాంటమ్మాయిని ఆమె తల్లిదండ్రులు ఇంట్లోంచి గెంటేస్తే.. ఎక్కడికీ వెళ్లలేక ఢిల్లీలోని వీధుల వెంబడి ఒంటరిగా తిరుగుతూ కనిపించేసరికి అవాక్కవడం మీడియా వాళ్ల వంతైంది. ఆశ్చర్యానికి గురి చేస్తున్న ఆ హీరోయిన్ వ్యవహారమేంటో తెలుసుకుందాం పదండి.

ఇక్కడ మాట్లాడుకుంటున్న హీరోయిన్ పేరు అలీసా ఖాన్. బాలీవుడ్ మూవీ ‘మై హజ్బెండ్స్ వైఫ్’లో ఇమ్రాన్ హష్మి సరసన హీరోయిన్‌గా నటించింది. సీరియయల్ కిస్సర్‌గా ముద్ర పడిన ఇమ్రాన్ హష్మి కథానాయకుడు. ఈ చిత్రం ఆగస్టులో విడుదల కావాల్సి ఉంది. ఐతే ఈ మధ్యే అలీసా బాయ్ ఫ్రెండ్.. వీళ్లిద్దరూ క్లోజ్ గా ఉన్న ఓ వీడియోను సోషల్ మీడియాలో పెట్టేశాడు. అది చూసిన ఆమె తల్లిదండ్రులకు ఒళ్లు మండిపోయింది. అసలు సినిమాల్లో నటించడానికే ఇష్టపడని వారు.. ఈ వీడియో చూశాక కోపంతో ఊగిపోయారు. అలీసాను ఇంటి నుంచి గెంటేశారు.

ఘజియాబాద్‌లో వీరిది గొప్ప పేరున్న కుటుంబం. అలీసాకు సంబంధించిన వీడియో గురించి అందరూ మాట్లాడుకుంటుండటంతో ఆమెను బయటికి పంపించేశారు. ఉన్నపళంగా ఇంటి నుంచి బయటపడిన అలీసా ఢిల్లీలోని కైలాష్ ప్రాంతంలో వీధుల వెంట తిరుగుతూ ఓ గుడిలో తలదాచుకోవడం గమనార్హం. ఇంట్లో వాళ్లకు ఇష్టం లేకపోయినా హీరోయిన్ కావాలన్న లక్ష్యంతో ముంబయికి చేరుకున్న ఆమెకు ఆరంభంలో చాలా ఇబ్బందులు ఎదురయ్యాయి. రాఖీ వోహ్రా అనే నటే తనపై లైంగిక వేధింపులకు పాల్పడిందని అప్పట్లో అలీసా కేసు పెట్టడం పెద్ద సంచలనం అయింది. తాజాగా మరోసారి ఆమె వార్తల్లోకి ఎక్కింది.