'గబ్బర్ సింగ్' బ్యాచ్ లో పవన్ ఎవరికి డేట్స్ ఇస్తాడో మరి...!

పవర్ స్టార్ పవన్ కళ్యాణ్ అర డజను సినిమాలు లైన్ లో పెట్టిన సంగతి తెలిసిందే. ఇప్పటికే వేణు శ్రీరామ్ దర్శకత్వంలో తెరకెక్కుతున్న 'వకీల్ సాబ్' చిత్రాన్ని దాదాపుగా పూర్తి చేశాడు. ఇక క్రిష్ జాగర్లమూడి తో ఓ పీరియాడికల్ మూవీ.. హరీష్ శంకర్ డైరెక్షన్ లో ఓ సినిమా.. సురేందర్ రెడ్డి దర్శకత్వంలో ఓ ప్రాజెక్ట్ కి పవన్ గ్రీన్ సిగ్నల్ ఇచ్చాడు. వీటితో పాటు బండ్ల గణేష్ నిర్మాణంలో ఓ ప్రాజెక్ట్.. సాగర్ కె.చంద్ర దర్శకత్వంలో ఓ సినిమా చేయనున్నాడు. ముందుగా అనుకున్న ప్రకారం 'వకీల్ సాబ్' షూటింగ్ పూర్తి కాగానే ఇప్పటికే 15 రోజులు చిత్రీకరణ జరిపిన క్రిష్ సినిమా చేయాలి. కాకపోతే బ‌డ్జెట్ ప్రాబ్లమ్స్ వల్ల ఈ సినిమా ఇప్పుడ‌ప్పుడే సెట్స్ మీద‌కి వ‌చ్చే ఛాన్స్ లేదని ఇండస్ట్రీ వర్గాల్లో అనుకుంటున్నారు. ఈ నేపథ్యంలో సితార ఎంటెర్టైన్మెంట్స్ బ్యానర్ లో 'అయ్యప్పనుమ్ కోషియమ్' రీమేక్ ని ముందుగా స్టార్ట్ చేయనున్నాడని తెలుస్తోంది.

అయితే ఈ సినిమా తర్వాత పవర్ స్టార్ ఎవరికి డేట్స్ కేటాయిస్తాడనేది ఆసక్తికరంగా మారింది. రామ్ త‌ళ్లూరి నిర్మించనున్న సురేంద‌ర్ రెడ్డి ప్రాజెక్ట్ సెట్స్ మీదకు రావడానికి చాలా సమయం పట్టనుందట. ప్రస్తుతం సూరి - వక్కంతం వంశీ కలిసి స్క్రిప్ట్ రెడీ చేసే పనిలో ఉన్నారని తెలుస్తోంది. ఈ నేపథ్యంలో హరీష్ శంకర్ - బండ్ల గణేష్ ఇద్దరూ పవన్ కళ్యాణ్ డేట్స్ కోసం పోటీ పడనున్నారని టాక్ నడుస్తోంది. మైత్రీ మూవీస్ బ్యానర్ లో హరీష్ శంకర్ సినిమా చేయనున్నాడని లాక్ డౌన్ కి ముందే అనౌన్స్ చేశారు. ఇక బండ్ల సైతం నా దేవుడు ఓకే అన్నాడు అంటూ ఇటీవల ప్రకటించాడు. ఇప్పుడు ప‌వ‌న్ బండ్ల‌ గణేష్ - హరీశ్ లలో ఎవరో ఒకరికి డేట్స్ ఇవ్వాల్సిన పరిస్థితి ఏర్పడింది. మరి ఈ 'గబ్బర్ సింగ్' బ్యాచ్ లో పవన్ ముందుగా ఎవరికి డేట్స్ కేటాయిస్తాడో చూడాలి.