సత్తారు ఏ మేరకు సత్తా చాటుతాడో..?

'LBW-లైఫ్ బిఫోర్ వెడ్డింగ్' అనే సినిమాతో ఇండస్ట్రీకి పరిచయమయ్యాడు టాలెంటెట్ డైరెక్టర్ ప్రవీణ్ సత్తారు. ఆ తర్వాత 'చందమామ కథలు' చిత్రంతో నేషనల్ అవార్డ్ అందుకొని అందరి దృష్టిని ఆకర్షించారు. 'గుంటూరు టాకీస్' సినిమాతో మరో సక్సెస్ అందుకున్నాడు. ఇదే క్రమంలో ఫాంలో లేని రాజశేఖర్ వంటి హీరోతో 'PSV గరుడవేగ' లాంటి మూవీ తీసి అందరినీ ఆశ్చర్య పరిచాడు. ఆ తర్వాత '9 అవర్స్' వెబ్ సిరీస్ తో ఓటీటీలోనూ అడుగుపెట్టాడు. ఇప్పుడు ''ది ఘోస్ట్'' చిత్రంతో ప్రేక్షకులను అలరించడానికి వస్తున్నాడు.

కింగ్ అక్కినేని నాగార్జున హీరోగా ప్రవీణ్ సత్తారు దర్శకత్వంలో తెరకెక్కిన హై వోల్టేజ్ యాక్షన్ ఎంటర్టైనర్ ''ది ఘోస్ట్''. శ్రీ వెంకటేశ్వర సినిమాస్ మరియు నార్త్ స్టార్ ఎంటర్టైన్మెంట్ బ్యానర్స్ పై ఈ చిత్రాన్ని నిర్మించారు. దసరా కానుకగా అక్టోబర్ 5వ తేదీన ప్రపంచ వ్యాప్తంగా విడుదల కాబోతోంది. ఈ నేపథ్యంలో ఇప్పటికే విడుదలైన ప్రమోషనల్ కంటెంట్ అనూహ్యమైన రెస్పాన్స్ అందుకుని సినిమాపై మంచి బజ్ క్రియేట్ చేసింది.

'ది ఘోస్ట్' సినిమాలో వింటేజ్ నాగ్ ని చూపించే ప్రయత్నం చేసాడు ప్రవీణ్ సత్తారు. శివ - అంతం - రక్షణ వంటి చిత్రాల్లోని ఇంటెన్స్ రోల్ ని నాగార్జున తో చేయించారు. ఇందులో ఇంటర్ పోల్ ఆఫీసర్ విక్రమ్ గా ప్రెజెంట్ చేయడానికి కింగ్ తో కసరత్తులు కూడా చేయించారు. టీజర్ - ట్రైలర్ తో అందరినీ ఆశ్చర్య పరిచాడు. దీంతో అక్కినేని అభిమానులు ఎలాంటి సినిమా అయితే కోరుకుంటున్నారో అలాంటి చిత్రాన్ని తీశారని అభిప్రాయానికి వచ్చేసారు. ఫ్యాన్స్ కోరుకునే అన్ని హంగులు జోడించి ఈ పవర్ ప్యాక్డ్ చిత్రాన్ని రెడీ చేసినట్లు నిర్ధారణకు వచ్చారు.

నిజానికి ప్రవీణ్ సత్తారు కెరీర్ ప్రారంభం నుంచి కూడా ఒక సినిమాకు మరో సినిమాకు సంబంధం లేకుండా సినిమాలు రూపొందిస్తూ వస్తున్నారు. వైవిధ్యమైన కథలతో తనదైన శైలి టేకింగ్ తో ప్రేక్షకులను ఎగ్జైట్ చేస్తూ వచ్చాడు. విషయమున్న దర్శకుడని అనిపించుకున్నాడు కానీ.. ప్రవీణ్ టాప్ లీగ్ లో చేరలేకపోయాడు.. స్టార్ హీరోలతో అవకాశాలు అందుకోలేకపోయాడు. ఈ నేపథ్యంలో ఇప్పుడు నాగార్జున వంటి సీనియర్ స్టార్ హీరోతో కలిసి 'ది ఘోస్ట్' సినిమాతో దసరా బరిలో నిలుస్తున్నాడు.

అవతలి వైపు 'గాడ్ ఫాదర్' లాంటి సినిమా ఉన్నప్పటికీ.. అది రీమేక్ కావడంతో ఘోస్ట్ సినిమా దర్శకుడే అందరి దృష్టిని ఎక్కువగా ఆకర్షిస్తున్నాడు. ఈసారి ప్రవీణ్ ఎలాంటి కథకథానాలతో రాబోతున్నాడనే ఆసక్తిని కలిగిస్తున్నాడు. ఇప్పటికైతే ప్రమోషనల్ కంటెంట్ అభిమానుల్లో అంచనాలను రెట్టింపు చేసింది. మరి వీటిని అందుకుని సత్తారు ఏ మేరకు సత్తా చాటుతాడో.. బాక్సాఫీస్ వద్ద ఎలాంటి విజయాన్ని సాధిస్తారో చూడాలి.

'ది ఘోస్ట్' సినిమాలో నాగార్జున సరసన సోనాల్ చౌహాన్ హీరోయిన్ గా నటించింది. గుల్ పనాగ్ - అనిఖా సురేంద్రన్ ఇతర ప్రధాన పాత్రలు పోషించారు. మార్క్ కె రాబిన్ - భరత్ - సౌరబ్ ఈ చిత్రానికి సంగీతం సమకూర్చగా.. ముఖేష్ జి సినిమాటోగ్రఫీ అందించారు. దినేష్ సుబ్బరాయన్ - కేచా మాస్టర్స్ యాక్షన్ కొరియోగ్రఫీ చేశారు. బ్రహ్మ కడలి ఆర్ట్ డైరెక్టర్ గా వ్యవహరించారు.

'ఘోస్ట్' చిత్రాన్ని తెలుగుతో పాటుగా హిందీ - తమిళ భాషల్లో విడుదల చేయడానికి మేకర్స్ సన్నాహాలు చేస్తున్నారని తెలుస్తోంది. ఇక దీని తర్వాత మెగా ప్రిన్స్ వరుణ్ తేజ్ తో కలిసి ప్రవీణ్ సత్తారు ఓ యాక్షన్ మూవీ చేయనున్నాడు. ఇప్పటికే లాంఛనంగా ప్రారంభించబడిన ఈ మూవీ త్వరలోనే సెట్స్ మీదకు వెళ్లనుంది.



నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.