రాజ్ తరుణ్ కు ఆ హీరోయిన్ తో ఏమైంది?

ఒక హీరో-హీరోయిన్ జంటకు హిట్ పెయిర్ అని పేరొచ్చాక.. ఆ కాంబినేషన్ ను రిపీట్ చేయడానికే ఆసక్తి చూపిస్తారు దర్శక నిర్మాతలు. హీరోలు కూడా తమకు కలిసొచ్చిన హీరోయిన్ తో మళ్లీ పని చేయడానికి ఆసక్తి చూపిస్తారు. ఐతే రాజ్ తరుణ్ మాత్రం ‘కుమారి 21 ఎఫ్’లో తనకు జోడీగా నటించిన హెబ్బా పటేల్ తో మళ్లీ ‘ఈడోరకం ఆడోరకం’ చేయడంపై అంత సంతృప్తిగా ఉన్నట్లు లేడు. తన ఇష్టానికి వ్యతిరేకంగా దర్శక నిర్మాతలే ఆమెను తనకు జోడీగా ఎంపిక చేసేశారు అన్నట్లు మాట్లాడాడు. తాను అయితే ప్రతిసారీ కొత్త హీరోయిన్ తో పని చేయడానికే ఆసక్తి చూపిస్తా అన్నాడు. మరోవైపు హెబ్బా సైతం రాజ్ తరుణ్ మీద ‘ఈడోరకం ఆడోరకం’ ప్రమోషనల్ ఈవెంట్లో సెటైర్లు గుప్పించింది.

ఈ కార్యక్రమంలో వీళ్లిద్దరూ ప్రవర్తించిన తీరు చూసినా వీళ్లిద్దరి మధ్యా ఏదో ఉంది అన్న ఫీలింగ్ జనాలకు కలిగింది. హీరోయిన్లతో కలిసి ర్యాంప్ వాక్ చేయాల్సి వచ్చినపుడు రాజ్ తరుణ్ చేయి పట్టుకుని నడవడానికి హెబ్బా ఇష్టపడలేదు. ఆమె తనకేం పట్టనట్లు సైలెంటుగా ఉండిపోగా మన హీరో కూడా ఆమెను బలవంత పెట్టలేదు. సోనారికా మాత్రం అతడి చేయి పట్టుకుని నడిచింది. మొత్తానికి వ్యవహారం చూస్తుంటే రాజ్-హెబ్బాల మధ్య ఏదో జరిగిందనే సంగతి స్పష్టంగా తెలిసిపోయింది.

ఇక తన కెరీర్ గురించి రాజ్ తరుణ్ మాట్లాడుతూ.. తాను సినిమా విషయంలో చాలా జాగ్రత్తగా ఉంటున్నాని.. రెమ్యూనరేషన్ విషయంలో పట్టుబడతాననే ఊహాగానాల్లో ఏమాత్రం వాస్తవం లేదని చెప్పాడు. తాను ఇంకా సరిపడినంత డబ్బు సంపాదించలేదని.. మంచి అవకాశం ఉంటే దర్శక నిర్మాతల్ని అడుక్కుని మరీ సినిమా చేస్తానని అన్నాడు. భవిష్యత్తులో తప్పకుండా దర్శకత్వం చేస్తానన్న రాజ్ తరుణ్.. ప్రస్తుతం దిల్ రాజు.. మారుతి బేనర్లలో సినిమా చేయబోతున్నట్లు చెప్పాడు. గీతాఆర్ట్స్-యువి క్రియేషన్స్ సంయుక్తంగా నిర్మించే సినిమా కూడా చేయాల్సి ఉందన్నాడు.