పవన్.. ఎన్టీఆర్.. తర్వాత అల్లరి నరేష్

అల్లరి నరేష్ ఇప్పుడు హిట్ కోసం చాలా ఆతృతగా ఎదురు చూస్తున్నాడు. 2012లో వచ్చిన సుడిగాడు తర్వాత.. తన స్థాయిలో సక్సెస్ సాధించలేదు ఈ కామెడీ హీరో. రీసెంట్ గా వచ్చిన సెల్ఫీరాజా.. కలెక్షన్స్ పరంగా పర్లేదని అనిపించింది కానీ.. అల్లరి నరేష్ రేంజ్ మూవీ అయితే మాత్రం కాదు. ప్రస్తుతం సెట్స్ పై ఉన్న 'ఇంట్లో దెయ్యం.. నాకేం భయం'.. అల్లరి నరేష్ ఆశలు తీర్చే ఛాన్స్ ఉంది.

నిర్మాత బీవీఎస్ఎన్ ప్రసాద్ కు.. సబ్జెక్ట్ ల ఎంపికపై మంచి పట్టుందనే టాక్ ఉంది. ఛత్రపతి ప్రసాద్ అని ఇండస్ట్రీ జనాలు ముద్దుగా పిలుచుకునే ఈయన మధ్యలో ట్రాక్ తప్పారు కానీ.. ఈమధ్య వరుస హిట్స్ కొట్టేస్తున్నారు. అత్తారింటికి దారేది చిత్రంతో పవర్ స్టార్ పవన్ కళ్యాణ్ కు కెరీర్ బెస్ట్ హిట్.. ఈయన బ్యానర్ పైనే వచ్చింది. ఆ తర్వాత తీసిన నాన్నకు ప్రేమతో కూడా ఎన్టీఆర్ కు కెరీర్ బెస్ట్ మూవీ. ఇప్పుడు ఇంట్లో దెయ్యం నాకేం భయం అంటూ అల్లరి నరేష్ తో తీస్తున్నారాయన. ఈ సినిమాకి మరో పాజిటివ్ పాయింట్ కూడా ఉంది.

కామెడీ చిత్రాల దర్శకుడు జి నాగేశ్వరరెడ్డి డైరెక్షన్ లో ఈ చిత్రం రూపొందుతోంది. అల్లరి నరేష్-నాగేశ్వరరెడ్డి కాంబినేషన్ లో గతంలో వచ్చిన సీమశాస్త్రి.. సీమ టపాకాయ్ చిత్రాలు మంచి హిట్ సాధించాయి. ఇప్పుడు అల్లరి నరేష్- బీవీఎస్ఎన్ ప్రసాద్- జి నాగేశ్వరరెడ్డి కాంబినేషన్ లో వస్తున్న ఫుల్ లెంగ్త్ ఎంటర్టెయినర్ 'ఇంట్లో దెయ్యం.. నాకేం భయం' పై కూడా ఇండస్ట్రీలో మంచి అంచనాలే ఉన్నాయి.