కమల్ సార్ ఇలా మొదలెట్టాడో లేదో..

కమల్ హాసన్ అంటే కాంట్రవర్శీ.. కాంట్రవర్శీ అంటే కమల్ హాసన్. కొన్నిసార్లు ఆయనే వివాదాల్ని వెంటాడుతూ వెళ్తాడు. ఇంకొన్నిసార్లు వివాదాలే ఆయన కోసం వెతుక్కుంటూ వస్తాయి. మొత్తానికి కాంట్రవర్శీ లేకుండా కమల్ సినిమా ఏది కూడా ప్రేక్షకుల ముందుకు రాదు. గతంతో పోలిస్తే కమల్ సాధ్యమైనంత వరకు సంయమనంతో ఉండటానికే ప్రయత్నిస్తున్నా.. ఆయన్ని లేనిపోని వివాదాలు వెంటాడుతున్నాయి. తన కొత్త సినిమా ‘శభాష్ నాయుడు’ షూటింగ్ అమెరికాలో మొదలుపెట్టి ప్రశాంతంగా తన పనేదో తాను చేసుకుంటుంటే.. ఇక్కడో అనవసర వివాదం చెలరేగింది.

శభాష్ నాయుడు అనే టైటిల్ మీద తమకు అభ్యంతరాలున్నాయని.. ఆ టైటిల్ మార్చాలని పట్టుబడుతూ తమిళ నాట ఓ కుల సంఘం నాయకులు తమ జిల్లాలో కలెక్టరును కలవడం విశేషం. ఇంతకీ వాళ్లకొచ్చిన ఇబ్బంది ఏంటంటే.. ‘శభాష్ నాయుడు’ అనే టైటిల్ పెట్టడం ద్వారా నాయుడు కులస్థులు మాత్రమే గొప్ప.. మిగతా వాళ్లంతా తక్కువ అనే అభిప్రాయం కలిగిస్తున్నారట. కాబట్టి తమ మనోభావాలు దెబ్బ తిన్నాయని.. టైటిల్ మార్చేలా చర్యలు తీసుకోవాలని వాళ్లు డిమాండ్ చేస్తున్నారు. ఇది కచ్చితంగా ఏదో పబ్లిసిటీ కోసం చేస్తున్న వ్యవహారం అని నిస్సందేహంగా చెప్పేయొచ్చు. నిజంగా మనోభావాలు దెబ్బ తీసే స్థాయిలో ఈ టైటిల్ ఉందా అని ఆలోచిస్తే విషయం అర్థమవుతుంది. మరి ఈ వివాదం మీద కమల్ ఎలా స్పందిస్తాడో.. వీళ్ల డియాండ్లకు తలొగ్గి టైటిల్ మారుస్తాడేమో చూద్దాం.