గీతాధిప‌తి ఆ వాయిదాని క‌న్ఫామ్ చేశారు

అగ్ర నిర్మాత‌గా .. ప‌రిశ్ర‌మ బాస్ గా గీతా ఆర్ట్స్ అధినేత అల్లు అర‌వింద్ ఏదైనా ఒక మాట చెబితే దానిని క‌న్ఫామ్ అని ఫిక్స్ చేసుకోవాలి. ఆయ‌న నోట ఏ మాట ఊడిప‌డినా అది మంచి ముత్యంగా మారుతుంది. ఫ‌లానా సినిమా హిట్టు అంటే హిట్టే. ఫ‌లానా క‌థ బాక్సాఫీస్ వ‌ద్ద మ్యాజిక్ చేస్తుంద‌ని చెప్పినా.. లేదూ ఫ‌లానా క‌థ‌లో ఈ లూప్ హోల్ ఉంద‌ని టీమ్ తో విశ్లేషించినా దానిని శిరోధార్యంగా భావించి చెప్పిన మార్పులు చేయాల్సిందే. ఇండ‌స్ట్రీలో సుదీర్ఘ అనుభ‌వం ఉన్న‌వాడిగా గీతాధిప‌తి మాట‌కు ప‌రిశ్ర‌మ‌లో ఇత‌రులు అంతే గౌర‌వం ఇస్తారు. పంపిణీదారుగా.. ఎగ్జిబిట‌ర్ గా.. నిర్మాత‌గా .. క‌థా విశ్లేష‌కుడిగా.. బాక్సాఫీస్ లెక్క‌ల పండితుడిగా అల్లు అర‌వింద్ స్టామినా నిరంత‌రం హాట్ టాపిక్.

అందుకే ఆయ‌న నోట `ఆ పెద్ద సినిమా వాయిదా` అన్న మాట రావ‌డంతో ఒక్క‌సారిగా జ‌నం అటువైపు చెవులు రిక్కించి విన్నారు. నేడు హైద‌రాబాద్ ప్ర‌సాద్ లాబ్స్ వేదిక‌గా `గుణ 369` ప్ర‌మోష‌న‌ల్ వేడుక‌లో గీతా ఆర్ట్స్ అధినేత అల్లు అర‌వింద్ ఓ మాట‌న్నారు. ఓ పెద్ద సినిమా వాయిదా ప‌డ‌డంతో ఇత‌రులంతా స‌ర్దేసుకున్నారు! అంటూ అదిరిపోయే లీక్ నే ఇచ్చారు. సాహో అని ఆయ‌న డైరెక్టుగా అన‌క‌పోయినా ఆ సినిమా పోస్ట్ పోన్ గురించిన ముచ్చ‌ట‌నే ఇది. దీంతో ఇప్ప‌టివ‌ర‌కూ ప్ర‌భాస్ - యువి క్రియేష‌న్స్ సినిమా `సాహో` రిలీజ్ వాయిదా ఉందా లేదా? అన్న సందిగ్ధ‌త అంద‌రిలోనూ ఇంకా ఏదో ఒక మూల తొలిచేస్తూనే ఉంది. ఇప్ప‌టివర‌కూ యువి క్రియేష‌న్స్ టీమ్ ఆ వాయిదా గురించి అధికారికంగా ప్ర‌క‌టించ‌క‌పోవ‌డంతో క‌న్ఫ్యూజ‌న్ నెల‌కొంది. తాజాగా బాస్ అర‌వింద్ క‌న్ఫామ్ చేసేశారు కాబ‌ట్టి ఇక సాహో వాయిదా ప‌డిన‌ట్టేన‌ని భావించ‌వ‌చ్చు.

సాహో వాయిదా ప‌డుతోంది అన్న అధికారిక లీక్ తోనే వెంట‌నే శ‌ర్వా-ర‌ణ‌రంగం.. అడివి శేష్ - ఎవ‌రు? చిత్రాల రిలీజ్ ఆగ‌స్టు 15న అంటూ క‌న్ఫామ్ చేసేశారు. ఇక ఈ రేస్ లోకి ఇంకా చిన్న సినిమాలు రాబోతున్నాయ‌ని తాజాగా బాస్ అల్లు అర‌వింద్ ఇచ్చిన హింట్ తో అర్థ‌మ‌వుతోంది. ఇక గుణ 369 స‌క్సెస్ సాధిస్తుందంటూ అల్లు అర‌వింద్ హీరో కార్తికేయ అండ్ టీమ్ ని ఆశీర్వ‌దించారు.