అల్లు అరవింద్ రూటే సెపరేటబ్బా..!

స్టార్ ప్రొడ్యూసర్ అల్లు అరవింద్ చాలా ప్రాజెక్టులను లైన్లో పెడుతున్నారు కానీ వాటిలో రెండు సినిమాలపై మాత్రం అందరి దృష్టి ఉంది. అవే అక్కినేని హీరోలు నాగచైతన్య.. అఖిల్ తో సెట్ చేస్తున్న ప్రాజెక్టులు. అఖిల్ నెక్స్ట్ సినిమా గీతా ఆర్ట్స్ లో ఉంటుందన్న సంగతి తెలిసిందే. అఖిల్ సినిమానే కాకుండా చైతుకోసం కూడా ఒక ప్రాజెక్ట్ సెట్ చేస్తున్నారు అరవింద్.

చిత్రమైన విషయం ఏంటంటే రెండు సినిమాలకు ఫ్లాప్ డైరెక్టర్ల పేర్లు వినిపిస్తుండడం. అఖిల్ సినిమాకు 'బొమ్మరిల్లు' భాస్కర్ ను డైరెక్టర్ గా ఇప్పటికే లాక్ చేశారని టాక్. ఇప్పుడు ఈ సినిమా కు ప్రీ ప్రొడక్షన్ జోరుగా సాగుతోందట. భాస్కర్ దాదాపుగా ఫేడ్ అవుట్ అయ్యాడు కానీ అరవింద్ గారికి మాత్రం భాస్కర్ టాలెంట్ పైన ఇప్పటికీ చాలా నమ్మకం ఉందట. ఫ్యామిలీ డ్రామాలను భాస్కర్ చక్కగా హ్యాండిల్ చేస్తాడనే ఉద్దేశంతో అలాంటి సినిమానే అఖిల్ కోసం సెట్ చేస్తున్నారట.

ఇక చైతుతో చేయబోయే ప్రాజెక్ట్ కోసం డైరెక్టర్ దశరథ్ ను సెట్ చేయాలని ప్లాన్ చేస్తున్నారట. 'సంతోషం'.. 'Mr. పర్ఫెక్ట్' లాంటి సూపర్ హిట్ సినిమాలను తెరకెక్కించిన దశరథ్ ఇప్పుడు ఫామ్ లో లేడు. కానీ రీసెంట్ గా దశరథ్ వినిపించిన కథ అరవింద్ గారికి నచ్చిందట. దీంతో ఆయన చైతన్యను ఆ కథ వినమని కోరాడట. ఒకవేళ చైతు ఒప్పుకుంటే ఈ కాంబినేషన్ సెట్స్ పైకి వెళ్ళే అవకాశాలు ఉన్నాయట. చైతు కోసం 'గీత గోవిందం' ఫేమ్ పరశురామ్ పేరు కూడా మధ్యలో విన్పించింది కానీ అదేమీ ఫైనలైజ్ కాలేదట. మంచి బ్రేక్ కోసం.. సాలిడ్ హిట్స్ కోసం ఎదురు చూస్తున్న అక్కినేని బ్రదర్స్ కోసం అల్లు అరవింద్ గారు ఇలా ఫ్లాప్ డైరెక్టర్లను సెట్ చేయడం వినడానికి వింతగానే ఉంది. కాకపోతే అరవింద్ గారు మాస్టర్ బ్రెయిన్ అని అందరికీ తెలుసు.. ఎంతో అలోచించి కానీ ఇలాంటి కాంబినేషన్లు సెట్ చేయరు. కథలో దమ్ముంటే తప్ప ఫ్లాప్ డైరెక్టర్లకు అవకాశం ఇవ్వరు. చూద్దాం ఏం జరుగుతుందో.