మల్లు వెర్షన్ కోసం అల్లు స్క్రీన్ ప్లే

తెలుగులో బ్లాక్ బస్టర్ గా నిలిచి, ఇండస్ట్రీ టాప్ 5లోకి అడుగు పెట్టిన సరైనోడు.. ఇప్పుడు కేరళలో సంచలనాలు సృష్టిస్తోంది. డైరెక్ట్ మలయాళ చిత్రాలకు మించి.. యోధావు పేరుతో రిలీజ్ అయిన డబ్బింగ్ సినిమాకి డబ్బులు ఎక్కువగా రావడం.. మల్లూవుడ్ ఇండస్ట్రీ జనాలను ఆశ్చర్యానికి గురి చేస్తోంది. మలయాళ సరైనోడు చిత్రం ఈ రేంజ్ సక్సెస్ సాధించడంలో.. అల్లు అండ్ టీం అప్లై చేసిన స్క్రీన్ ప్లే చూస్తే.. ఔరా అనక తప్పదు.

ఒకవేళ తెలుగులో రిలీజ్ చేసిన డేట్ కే మలయాళ వెర్షన్ కూడా వచ్చి ఉంటే.. ఖచ్చితంగా అక్కడ డివైడ్ టాక్ వినిపించేదే. ఇక్కడ మెగా మాస్ రచ్చ కారణంగా బ్లాక్ బస్టర్ అయినా.. అక్కడ నిరాశపరచడానికే అవకాశాలు ఎక్కువగా ఉండేవి. కానీ ఈ చిత్రాన్ని తెలుగులో మాత్రమే రిలీజ్ చేసి.. వీలైనంతగా ప్రమోట్ చేసి.. బ్లాక్ బస్టర్ కొట్టేశాడు బన్నీ బాబు. ఇక్కడ 70 కోట్ల వసూళ్లు వచ్చేశాక.. అప్పుడు మలయాళ మార్కెట్ సంగతి చూసుకుంటున్నాడు.

తెలుగులో ఆల్రెడీ ఇండస్ట్రీ బిగ్గెస్ట్ హిట్ అనే ప్రచారం మలయాళ వెర్షన్ యోధావుకి బాగా ప్లస్ అయింది. అలాగే అల్లు అర్జున్ - రకుల్ ప్రీత్ సింగ్- కేథరిన్ థ్రెసాలు ఫుల్ ప్లెడ్జెడ్ గా మల్లు మూవీ కోసం ప్రచారం చేస్తున్నారు. విడివిడిగా విడుదల చేయడంతోనే ఈ రేంజ్ పబ్లిసిటీకి వీలు చిక్కింది. ఏమైనా.. సరైనోడుతో అన్ని చోట్లా సరైన సక్సెస్ సాధించడానికి.. అల్లు అండ్ టీం ఉపయోగించిన స్క్రీన్ ప్లే మాత్రం అదుర్స్ అంతే.