హ్యాట్రిక్‌ సినిమాకే బన్నీ సిగ్నల్‌?

ఇప్పటివరకు ఏ దర్శకుడితోనూ మూడు సినిమాలూ చేయలేదు ఈ హీరో. ఏ హీరోతోనూ.. మూడు సినిమాలు చేయలేదు ఆ దర్శకుడు. వీళ్లిద్దరూ ఇప్పుడు కలసి తమ మూడో సినిమా చేయబోతున్నారా? టాక్‌ ఎప్పటినుండో ఉంది కాని.. ఇంతవరకు ఫైనలైజ్‌ మాత్రం కావట్లేదు. ఇంతకీ ఇదంతా ఎవరి గురించో తెలుసుగా...

ఇప్పటికే ఇద్దరు దర్శకులు స్టయిలిష్‌ స్టార్‌ అల్లు అర్జున్‌ కోసం క్యూలో ఎదురు చూస్తున్నారు. టాలెంటెడ్‌ డైరక్టర్ అయిన విక్రమ్‌.కె.కుమార్‌.. అలాగే లింగుస్వామి.. బన్నీ తదుపరి సినిమా సైన్‌ చేస్తాడేమోనని వెయిటింగ్‌. ఇక వీరందరూ ఒకెత్తయితే.. మొన్ననే దర్శకుడు త్రివిక్రమ్‌ ఒక కథను చెప్పాడని ఆల్రెడీ అనుకున్నాం. పైగా ఈ సినిమాలో నాగార్జున కూడా ఒక రోల్ చేసే ఛాన్సుందట. అయితే బన్నీ తమిళ డైరక్టర్లను పక్కనెట్టేసి.. త్రివిక్రమ్‌ తో మూడో సినిమాను చేస్తేనే బెటర్‌ అంటూ ఆలోచిస్తున్నాడని తెలుస్తోంది. పైగా ఈ సినిమాను కూడా సొంతంగా గీతా ఆర్ట్స్‌ లోనే తీసే అవకాశం ఉందట.

అలాగైతే ఇటు బన్నీ అటు త్రివిక్రమ్‌ లకు ఇది హ్యాట్రిక్‌ సినిమాయే. ఇప్పటికే వీళ్ళ కాంబినేషన్లో వచ్చిన జులాయ్‌, సన్నాఫ్‌ సత్యమూర్తి సినిమాలు మాంచి హిట్లుగా నిలిచిన తరుణంలో.. ఈ మూడో సినిమా ఎలా ఉండబోతోంది అనే ఆసక్తి సాధారణంగానే రెట్టింపవుతోంది.