బన్నీ రాజుల మధ్య 96 గేమ్

క్లాసిక్ అనిపించుకునే కొన్ని ఇతర బాషా చిత్రాల రీమేక్ రైట్స్ కోనేంత వరకు బాగానే ఉంటుంది కాని ఆ కథకు తగ్గ ఒరిజినల్ ఫీలింగ్ చెడిపోకుండా ఆర్టిస్టులను దర్శకుడిని సెట్ చేసుకోవడం మాత్రం సులభంగా ఉండదు. దిల్ రాజు అదే పరిస్థితిని అనుభవిస్తున్నారు. విజయ్ సేతుపతి త్రిషల కాంబోలో రూపొందిన 96 అక్కడ ఎంత పెద్ద హిట్టో తెలిసిందే. టీవీలో వచ్చాక కూడా ధియేటర్లో హౌస్ ఫుల్ అయిన సినిమాగా దీని గురించి చెన్నై మీడియాలో చాలా కథలు వచ్చాయి. విడుదలకు ముందే దీని హక్కులు కొన్న దిల్ రాజు నానికి అల్లు అర్జున్ కు ప్రత్యేకంగా షోలు వేసి చూపించారు.

కథ ప్రకారం హీరో 38 ఏళ్ళ వయసు వాడు కావడంతో పాటు కాస్త ఏజ్ లుక్ వచ్చేలా పాత్ర డిజైన్ ఉండటంతో విజయ్ సేతుపతి లాగా అన్ని పాత్రల్లో ఒదిగిపోయే స్టార్ ఇక్కడ లేరు. పోనీ నానితో చేద్దాం అంటే సూట్ కాడు అనిపిస్తుంది. అల్లు అర్జున్ సాహసం చేయలన్నా ఇమేజ్ అడ్డంకి. అందుకే హోల్డ్ లో పెట్టేసారు. తాజా సమాచారం మేరకు బన్నీ 96 హక్కులను తనకే అమ్మేయమని దిల్ రాజుని అడిగాడట. ఎలాగూ సినిమా నిర్మాణంలోకి అడుగు పెట్టాలి అనుకున్నాడు కాబట్టి ఇలాంటి ఫీల్ గుడ్ లవ్ స్టొరీ అయితే మంచి లాంచింగ్ గా ఉంటుందని తన ఆలోచనట.

దిల్ రాజు కొంత సమయం అడిగినట్టు తెలిసింది. ఒకవేళ అల్లు అర్జున్ కొన్నా వేరే హీరోతో చేయాల్సిందే తప్ప తనకు వర్క్ అవుట్ కాదు. లేదూ ఇద్దరు భాగస్వామ్యంలో జట్టు కడతారా అనేది కూడా ప్రస్తుతానికి సస్పెన్స్. మొత్తానికి తమిళ్ లో కలెక్షన్స్ లో సెన్సేషన్ సృష్టించిన 96 తెలుగులో మాత్రం మేకింగ్ కు వెళ్ళడానికి ముందే ఇంత సంచలనం రేపుతోంది