మళ్ళీ మారేడుమిల్లి కి పుష్పరాజ్..!

అల్లు అర్జున్ హీరోగా సుకుమార్ దర్శకత్వంలో తెరకెక్కుతున్న యాక్షన్ డ్రామా ''పుష్ప''. శేషాచలం అడవుల్లో ఎర్రచందనం స్మగ్లింగ్ నేపథ్యంలో ఈ సినిమా రూపొందుతోంది. తూర్పు గోదావరి జిల్లాలోని మారేడుమిల్లి అభయారణ్యంలో సినిమాలోని ఎక్కువ భాగం షూటింగ్ జరిగింది. ఈ క్రమంలో 'పుష్ప'టీమ్ మరోసారి మారేడుమిల్లి కి వెళ్ళింది. ఇటీవల పూర్తైన హైదరాబాద్ షెడ్యూల్ లో హీరో విలన్ల మధ్య కీలక సన్నివేశాలను చిత్రీకరించారు. ఇప్పుడు ఫారెస్ట్ బ్యాక్ డ్రాప్ లో తీయాల్సిన యాక్షన్ సీన్స్ కోసం మళ్ళీ అక్కడికే వెళ్లారని తెలుస్తోంది.

పాన్ ఇండియా స్థాయిలో రూపొందుతున్న 'పుష్ప' చిత్రాన్ని రెండు భాగాలుగా విడుదల చేస్తున్నారు. ఫస్ట్ పార్ట్ ని 'పుష్ప: ది రైజ్' పేరుతో క్రిస్మస్ సీజన్ లో విడుదల చేయడానికి సన్నాహాలు చేస్తున్నారు. ఇప్పటికే మెజారిటీ భాగం షూటింగ్ కంప్లీట్ చేసిన చిత్ర బృందం.. సెప్టెంబర్ చివరి నాటికి టాకీ మొత్తాన్ని పూర్తి చేయాలని ప్లాన్ చేస్తున్నారు. మారేడుమిల్లి షెడ్యూల్ తర్వాత, హైదరాబాద్ లో జరిగే మరో షెడ్యూల్ తో చిత్రీకరణ పూర్తవుతుందని సమాచారం.

'పుష్ప' చిత్రంలో రష్మిక మందన్నా హీరోయిన్ గా నటిస్తుండగా.. మలయాళ నటుడు ఫహాద్ ఫాజిల్ విలన్ గా కనిపించనున్నారు. ప్రకాష్ రాజ్ - జగపతిబాబు - ధనుంజయ్ - అజయ్ - సునీల్ - అనసూయ ఇతర కీలక పాత్రలు పోషిస్తున్నారు. రాక్ స్టార్ దేవిశ్రీ ప్రసాద్ ఈ చిత్రానికి సంగీతం సమకూరుస్తున్నారు. మిరోస్లా కుబా బ్రోజెక్ సినిమాటోగ్రఫీ అందిస్తుండగా.. ఆంటోనీ రూబెన్ ఎడిటింగ్ బాధ్యతలు నిర్వర్తిస్తున్నారు. రసూల్ పూకుట్టి సౌండ్ డిజైనింగ్ చేస్తున్నారు.

ఇప్పటికే విడుదలైన హీరో విలన్ల ఫస్ట్ లుక్స్ - టీజర్ - 'దాక్కో దాక్కో మేక' సాంగ్ విశేష స్పందన తెచ్చుకున్నాయి. లారీ డ్రైవర్ పుష్పరాజ్ గా ఊర మాస్ లుక్ లో బన్నీ అలరించనున్నారు. ఐపీఎస్ భన్వర్ సింగ్ షెకావత్ గా ఫహాద్ ఫాజిల్ నటిస్తున్నారు. మైత్రీ మూవీ మేకర్స్ - ముత్యంశెట్టి మీడియా బ్యానర్స్ పై నవీన్ ఎర్నేని - వై రవిశంకర్ భారీ బడ్జెట్ తో ఈ చిత్రాన్ని నిర్మిస్తున్నారు.