బన్నీ ని తెగ వాడేస్తున్న కుర్ర హీరోలు..!

ప్రస్తుతం ఇండస్ట్రీలో ఎక్కడ చూసినా అల్లు అర్జున్ సందడే కనిపిస్తోంది. టాలీవుడ్ లో ఏ ఈవెంట్ ప్లాన్ జరిగినా దానికి చీఫ్ గెస్టుగా బన్నీ హాజరవుతున్నారు. అందుకే మీడియా సోషల్ మీడియాలో గత కొన్ని రోజులుగా పుష్పరాజ్ హంగామా ఎక్కువగా కనిపిస్తోంది. ఈ మధ్య కాలంలో అల్లు అర్జున్ అనేక చిన్న మీడియం రేంజ్ సినిమాలకు తన వంతు సపోర్ట్ ఇస్తున్నారు. ప్రమోషనల్ కంటెంట్ తన చేతుల మీదుగా రిలీజ్ చేయడమే కాకుండా.. సినిమా ఫంక్షన్స్ కు కూడా అటెండ్ అవుతున్నారు.

ఇటీవల అఖిల్ అక్కినేని నటించిన 'మోస్ట్ ఎలిజిబుల్ బ్యాచిలర్' సినిమా సక్సెస్ మీట్‌ కి అల్లు అర్జున్ ముఖ్య అతిథిగా హాజరయ్యారు. తమ హోమ్ బ్యానర్ గీతా ఆర్ట్స్ లో రూపొందిన సినిమా కావడంతో గెస్టుగా వచ్చారని అందరూ అనుకున్నారు. అయితే లేటెస్టుగా నాగశౌర్య హీరోగా చేసిన 'వరుడు కావలెను' సినిమా ప్రీ రిలీజ్ ఈవెంట్‌ లో కూడా బన్నీ చీఫ్ గెస్ట్ గా ప్రత్యేక ఆకర్షణగా నిలిచారు. తనవంతు సాయంగా ఈ సినిమాకు కావాల్సినంత బజ్ ను క్రియేట్ తెచ్చిపెట్టాడు.

ఇదే క్రమంలో ఇప్పుడు అల్లు అర్జున్.. యంగ్ హీరో ఆనంద్ దేవరకొండ నటించిన కొత్త చిత్రం "పుష్పక విమానం" ట్రైలర్ రిలీజ్ ఈవెంట్ కు అతిథిగా హాజరు కానున్నారు. అక్టోబర్ 30న హైదరాబాద్ లో గ్రాండ్ గా జరగనున్న ఈ కార్యక్రమంలో బన్నీ ట్రైలర్ ను లాంచ్ చేస్తారని మేకర్స్ వెల్లడించారు. స్టార్ హీరో చేతుల మీదుగా ట్రైలర్ విడుదల అవుతుండటం పట్ల చిత్ర యూనిట్ సంతోషం వ్యక్తం చేస్తోంది. ఈ నేపథ్యంలో టీమ్ అంతా కలిసి థాంక్యూ బన్నీ అన్నా అంటూ సెలబ్రేట్ చేసుకున్నారు.

ఇలా అల్లు అర్జున్ ప్రస్తుతం చాలా సినిమాలకు అథితిగా హాజరు కాబోతున్నారు. బన్నీ క్రేజ్ సినిమాకు ప్లస్ అవుతుందనే ఉద్దేశ్యంతో అందరూ చీఫ్ గెస్టుగా వచ్చి సపోర్ట్ చేయమని కోరుతున్నారని తెలుస్తోంది. ముఖ్యంగా టాలీవుడ్ కుర్ర హీరోలకు బన్నీ ఇమేజ్ బాగా కలిసొచ్చే అవకాశం ఉందని.. అందుకే అందరూ తెగ వాడేస్తున్నారని కామెంట్స్ వినిపిస్తున్నాయి. అయితే అదే సమయంలో అల్లు అర్జున్ ఇలాంటి కార్యక్రమాలకు అటెండ్ అవుతూ తన సొంత సినిమా కంటే ఇతర హీరోల సినిమాలను ప్రమోట్ చేయడం వల్ల ఆయన ఇమేజ్‌ మరో స్థాయికి వెళ్తుందని అభిమానులు భావిస్తున్నారు.

అంతేకాదు అల్లు అర్జున్ ఇలా మీడియాలో సోషల్ మీడియాలో సందడి చేయడం అంటే పరోక్షంగా 'పుష్ప' సినిమా ప్రమోషన్లు కూడా జరుగుతున్నట్టే అని కామెంట్స్ చేస్తున్నారు. ఏదేమైనా కరోనా కారణంగా కళ తప్పిన థియేటర్లన్నీ ఇప్పుడిప్పుడే కోలుకుంటున్నాయి. బన్నీ లాంటి స్టార్ హీరో యంగ్ హీరోల సినిమా ప్రమోషన్స్ లో భాగం అయితే ఎక్కువ మంది జనాలను థియేటర్‌లకు వచ్చే అవకాశం ఉంటుంది. దీని వల్ల తెర మీద తెర వెనుక కష్టపడే ప్రతి ఒక్కరికీ లాభం చేకూరుస్తుందని చెప్పవచ్చు.

ఇక "పుష్పక విమానం" సినిమా విషయానికొస్తే.. 'మిడిల్ క్లాస్ మెలోడీస్' వంటి సూపర్ హిట్ తర్వాత విజయ్ దేవరకొండ తమ్ముడు నటిస్తున్న మూవీ ఇది. నవంబర్ 12న థియేటర్లలోకి రాబోతోంది. సురేష్ ప్రొడక్షన్స్ - గ్లోబల్ సినిమాస్ - ఫ్రీజ్ ఫ్రేమ్ ఫిలింస్ సంస్థలు ఈ చిత్రాన్ని డిస్ట్రిబ్యూట్ చేస్తున్నాయి. నూతన దర్శకుడు దామోదర ఈ సినిమాని తెరకెక్కించారు. విజయ్ దేవరకొండ సమర్పణలో కింగ్ అఫ్ ది హిల్ ఎంటర్ టైన్మెంట్స్ మరియు టాంగా ప్రొడక్షన్స్ సంస్థలు సంయుక్తంగా ఈ మూవీని నిర్మించాయి. గోవర్ధన్ రావు దేవరకొండ - విజయ్ మట్టపల్లి - ప్రదీప్ ఎర్రబెల్లి లు దీనికి నిర్మాతలు. ఇప్పటికే విడుదలైన ప్రచార చిత్రాలు - పాటలు మంచి స్పందన తెచ్చుకున్నాయి. ఈ క్రమంలో అల్లు అర్జున్ చేతులు మీదుగా రిలీజ్ చేయబడుతున్న "పుష్పక విమానం" ట్రైలర్ ఎలా ఉంటుందో చూడాలి.