బన్నీ భలే సెలబ్రేట్ చేశాడండీ

చూస్తుండగానే ఇంతింతై అన్నట్లు ఎదిగిపోయాడు అల్లు అర్జున్. అతను ‘గంగోత్రి’ సినిమాతో అరంగేట్రం చేసినపుడు స్టార్ హీరో అవుతాడని ఎవ్వరూ అనుకోలేదు. కెరీర్ ఆరంభంలో మంచి హిట్లే కొట్టినా.. చాలా ఏళ్లు మీడియం రేంజి హీరోగానే ఉన్నాడు. కానీ తర్వాత ఒక్కో మెట్టు పైకెక్కుతూ ఇప్పుడు టాలీవుడ్ టాప్ స్టార్స్ లో ఒకడిగా ఎదిగిపోయాడు. తెలుగులో వరుసగా మూడు 50 కోట్ల షేర్ మూవీస్ ఇచ్చిన ఏకైక హీరో అల్లు అర్జునే. అతడి క్రేజ్ కేవలం తెలుగుకే పరిమితం కాలేదు. మలయాళంలో కూడా మనోడు స్టారే. సౌత్ ఇండియాలో ఉన్న మిగతా భాషల వాళ్లకు కూడా బన్నీ ఇష్టుడైపోతున్నాడనడానికి ఫేస్ బుక్ లో అతడి పేజీకి కోటి లైక్స్ రావడమే నిదర్శనం.

ఇది సౌత్ ఇండియాలో మరే హీరోకూ సాధ్యం కాని ఘనత. నిన్నే ఈ రికార్డు అందుకుని గాల్లో తేలిపోతున్నాడు బన్నీ. ఈ ఆనందాన్ని అభిమానుల్ని తనదైన స్టయిల్లో పంచుకున్నాడు. కోటి లైక్స్ సందర్భాన్ని పురస్కరించుకుని స్పెషల్ డిజైన్డ్ పోస్టర్లు తయారు చేయించి.. ఫేస్ బుక్ - ట్విట్టర్లలో షేర్ చేశాడు. అందరికీ థ్యాంక్స్ చెప్పాడు. బన్నీ పేజీకి ఇన్ని లైక్స్ లభించడానికి ఆ పేజీ మెయింటైనెన్స్ కూడా ఓ కారణమే. బన్నీ ఈ విషయంలో స్పెషల్ కేర్ తీసుకుంటున్నాడు మొదటి నుంచి. కోటి లైక్స్ వచ్చిన సందర్భంలోనూ ఆ కేర్ చూపించి మరోసారి అభిమానుల్ని ఆకట్టుకున్నాడు.