హై ఫై బార్ పెడుతున్న బన్నీ

అబ్బో.. టాలీవుడ్ స్టార్‌ హీరోలు ఒక్కొక్కరూ ఒక్కో బిజినెస్ పెడుతున్నరుగా. నాగార్జున హోటల్స్.. రవితేజ ఇన్వెస్టుమెంట్స్.. రామ్‌ చరణ్‌ ఎయిర్ లైన్స్.. చిన్న హీరోల రెస్టారెంట్స్.. ఇలా అందరూ ఏదో ఒక వ్యాపారం చేస్తూనే ఉన్నారు. మరి వీళ్ళతో నేనెందుకు జాయిన్ అవ్వకూడదు అంటున్నాడు స్టయిలిష్‌ స్టార్ అల్లు అర్జున్.

యం కిచెన్స్ అనే రెస్టారెంట్.. హై లైఫ్‌ బ్రూయింగ్‌ కో అనే బారు వారితో కలసి.. ఇప్పుడు హైదరాబాదులో ఒక కొత్త కాన్సెప్టు ఓరియెంటెడ్ నైట్ క్లబ్ పెడుతున్నాడు బన్నీ. ''యం కిచెన్స్ మరియు బఫెలో వైల్డ్ వింగ్స్ అనే సంస్థలు నన్ను ఎప్రోచ్ అయినప్పుడు.. పెద్దగా ఆలోచించాలని అనిపించలేదు. వారితో కలసి ''800 జూబిలీ'' అనే క్లబ్ పెడుతున్నాం'' అంటూ ప్రముఖ పత్రిక టైమ్స ఆఫ్‌ ఇండియా వారికి ఇచ్చిన ఇంటర్యూలో చెప్పుకొచ్చాడు మన సినీ హీరో. హైదరాబాద్ జూబ్లీ హిల్స్ రోడ్ నెం.36లో రాబోతున్న ఈ క్లబ్ లో ఒక కేఫ్‌ - జపానీస్‌ రెస్టారెంట్ - బార్బిక్యూ రెస్టారెంట్ వగైరా ఉంటాయట. క్లబ్ లో స్వయంగా వారే తయారుచేసిన బీర్లు వగైరా కూడా దొరుకుతాయి.

జూలై 29న స్వయంగా అల్లు అర్జున్ చేతుల మీదుగా ఈ క్లబ్ ఓపెన్ చేయనున్నారట. ఇప్పటివరకు బ్రూయింగ్ అంటే తెలియకుండా ఓన్లీ సీల్డ్ ఆల్కహాల్ తాగిన హైదరాబాదుకు కొత్త రుచిని చూపిస్తాం అంటున్నారు ఈ క్లబ్ పార్టనర్లు.