అల్లు అర్జున్.. ఒక స్వీట్ సర్ ప్రైజ్

స్టైలిష్ స్టార్ అల్లు అర్జున్ దాదాపుగా ఒక ఏడాది పాటు షూటింగ్ లకు దూరంగా ఉన్నాడు కానీ ఇప్పుడు మళ్ళీ జోరు పెంచాడు. మొత్తం మూడు ప్రాజెక్టులను లైన్లో పెట్టిన బన్నీ వాటిలో మొదటగా త్రివిక్రమ్ శ్రీనివాస్ సినిమాను ప్రారంభించాడు. అ సినిమా షూటింగ్ జోరుగా సాగుతోంది. ఇదిలా ఉంటే సుకుమార్ తో చేయాల్సిన సినిమా.. వేణు శ్రీరాం ప్రాజెక్ట్ లు ఎప్పుడు సెట్స్ మీదకు వెళ్తాయనే విషయంపై పెద్దగా ఎవరికీ క్లారిటీ లేదు.

అయితే సడెన్ గా బన్నీ అందరికీ సర్ ప్రైజ్ ఇచ్చేందుకు రెడీ అయ్యాడు. సుకుమార్ తో చేయబోయే సినిమాను మే 11 న లాంచ్ చేసేందుకు ముహూర్తం ఫిక్స్ చేశారట. ప్రస్తుతం అల్లు అర్జున్ త్రివిక్రమ్ తో చేస్తున్న సినిమా అల్లు అర్జున్ కెరీర్ లో 19 వ చిత్రం కావడం తో #AA19 అంటున్నారు. ఈ సినిమా #AA 20 గా వ్యవహరించనున్నారు. మహేష్ బాబు కోసం సుకుమార్ ఒక స్క్రిప్ట్ ను రెడీ చేసిన సంగతి తెలిసిందే. కొన్ని కారణాల వల్ల ఆ సినిమా ముందుకు వెళ్ళలేదు. ఇప్పుడు ఆ స్క్రిప్ట్ తోనే అల్లు అర్జున్ సినిమాను తెరకెక్కిస్తారని సమాచారం. ఈ సినిమా కథ ఎర్రచందనం స్మగ్లింగ్ నేపథ్యంలో సాగుతుందని.. హీరో పాత్ర విభిన్నంగా ఉంటుందని అంటున్నారు. మైత్రీ మూవీ మేకర్స్ వారు ఈ సినిమాను నిర్మిస్తారు.

అల్లు అర్జున్-సుకుమార్ కాంబినేషన్ లో తెరకెక్కనున్న మూడవ చిత్రం ఇది. గతంలో ఇద్దరు 'ఆర్య'.. 'ఆర్య 2' చిత్రాలకు కలిసి పని చేశారు. త్వరలోనే ఈ సినిమాకు సంబంధించిన ఇతర వివరాలు వెల్లడవుతాయి.