బన్నీ.. లుక్ అదిరింది పో

ఓపక్క మెగా అభిమానులు ‘సర్దార్ గబ్బర్ సింగ్’ ఫీవర్ తో ఊగిపోతుంటే.. వాళ్లకు మరింత ఉత్సాహాన్ని కలిగించే లుక్ తో పలకరిస్తున్నాడు అల్లు అర్జున్. ఉగాది నేపథ్యంలో విడుదల చేసిన ‘సరైనోడు’ కొత్త పోస్టర్లో బన్నీ సింప్లీ అదరగొట్టేశాడంతే. తెల్ల చొక్కా... తెల్ల ప్యాంటు.. తెల్ల చెప్పులు.. మెడలో రుమాలు.. గోల్డ్ చైను.. చేతికి బ్రేస్ లెట్.. ఇలా ఫుల్ మాస్ అవతారంలోకి మారిపోయిన స్టైలిష్ స్టార్ లుక్ అదుర్స్ అనిపిస్తోంది. టీజర్లో అన్నట్లు.. ‘మాస్.. ఊర మాస్’ అనే డైలాగ్ ఈ పోస్టరుకి పక్కాగా సరిపోయింది. బహుశా ఇది ‘సరైనోడు’ టైటిల్ సాంగ్ లో బన్నీ లుక్ కావచ్చేమో.

ఇప్పటికే పోస్ట్ ప్రొడక్షన్ కార్యక్రమాలతో పాటు సెన్సార్ కూడా పూర్తి చేసుకున్న ‘సరైనోడు’ ఈ నెల 22న గ్రాండ్ రిలీజ్ కు రెడీ అవుతోంది. బన్నీ కెరీర్లోనే ఇంత హై ఓల్టేజ్ యాక్షన్ ఇప్పటిదాకా లేదని సెన్సార్ రిపోర్ట్ ను బట్టి తెలుస్తోంది. బోయపాటి సినిమాలంటేనే మాస్.. యాక్షన్ అంశాలకు పెద్ద పీట ఉంటుంది. బన్నీ విషయంలోనూ అతనేమీ తగ్గలేదని సమాచారం. తమన్ ఆడియోకు మంచి రెస్పాన్స్ వస్తుండగా.. ఈ ఆదివారం వైజాగ్ లో ఆడియో సక్సెస్ మీట్ భారీగా ప్లాన్ చేశాడు నిర్మాత అల్లు అరవింద్. బన్నీకెరీర్లోనే హైయెస్ట్ బడ్జెట్ తో తెరకెక్కి.. హైయెస్ట్ బిజినెస్ చేసిన ‘సరైనోడు’.. రిలీజ్ పరంగా కూడా రికార్డు నెలకొల్పబోతోంది.