బన్నీ మనం లాంటి సినిమా చేస్తే..

ఇష్టం - 13 బి - ఇష్క్ - మనం... ఒక సినిమాకు ఇంకో సినిమాకు ఏమైనా సంబంధం ఉందా? విక్రమ్ కుమార్ ఎంతటి విలక్షణ దర్శకుడో ఈ లిస్టు చూస్తేనే అర్థమైపోతుంది. ఇప్పుడా దర్శకుడి నుంచి ‘24’ అనే మరో భిన్నమైన సినిమా వస్తోంది. సూర్య హీరోగా తెరకెక్కుతున్న ఈ సినిమా ఒక సైకలాజికల్ థ్రిల్లర్ అని చెబుతున్నారు. షూటింగ్ దాదాపుగా అయిపోవచ్చింది. ఐతే దీని తర్వాత విక్రమ్ ఎవరితో సినిమా చేస్తాడు? ఏ భాషలో చేస్తాడు? అని అంతా ఆసక్తిగా ఎదురు చూస్తున్నారు.

‘మనం’ తర్వాత తెలుగులో చాలా ఆఫర్లు వచ్చినా వద్దనుకుని సూర్యతో తన డ్రీమ్ ప్రాజెక్ట్ మొదలుపెట్టాడు విక్రమ్. ఐతే ఈ సినిమా తర్వాత మళ్లీ తెలుగులోనే సినిమా చేస్తాడట. అతను అల్లు అర్జున్ తో జట్టు కట్టబోతున్నట్లు సమాచారం. ప్రస్తుతం బన్నీ బోయపాటి శ్రీను దర్శకత్వంలో ‘సరైనోడు’ చేస్తున్నాడు. దీని తర్వాత కొరటాల శివతో సినిమా అన్నారు కానీ.. అతను ఎన్టీఆర్ తో కమిటైపోయాడు. ప్రస్తుతానికి బన్నీకి ఇంకెవరితోనూ కమిట్మెంట్లు లేవు. ఈ మధ్యే విక్రమ్ ఓ కథ చెప్పగా బన్నీకది నచ్చిందని.. ఇద్దరూ కలిసి తమ తర్వాతి సినిమాగా అదే చేద్దామని ఫిక్సయ్యారని మెగా ఫ్యామిలీ వర్గాలు చెబుతున్నాయి. చూద్దాం.. విక్రమ్ దర్శకత్వంలో బన్నీ మనం లాంటి మంచి సినిమా చేస్తాడేమో.