బ‌న్నీ సంద‌డి లేదేంటి?!

పండ‌గ‌లు - ప్ర‌త్యేక‌ దినాలొస్తున్నాయంటే సినిమా ఇండ‌స్ట్రీ చూపంతా వాటివైపే ఉంటుంది. రెడీ అయ్యిందంటే సినిమాని.. లేదంటే టీజ‌ర్‌ నో - ట్రైల‌ర్‌ నో - పాట‌ల్నో విడుద‌ల చేయాల‌ని చూస్తుంటారు. అందరూ ఖాళీగా ఉండే సమయం కాబట్టి పండ‌గ సీజ‌న్‌ ని ఎలాగోలా యూజ్ చేసుకోవాల‌నే ఆలోచ‌న‌తోనే ఉంటారు ద‌ర్శ‌క‌నిర్మాత‌లు. ఆ ర‌కంగా ఈసారి సంక్రాంతికి నాలుగు సినిమాలొచ్చాయి. వాటితో పాటు కొత్త సినిమాల ప్ర‌చార సంద‌డి కూడా ఉంటుంద‌ని ఊహించారంతా. బ‌న్నీ - ప‌వ‌న్‌ క‌ళ్యాణ్‌ - మ‌హేష్‌ బాబు త‌మ త‌మ కొత్త సినిమాల‌కి సంబంధించి టీజ‌ర్ల‌ని విడుద‌ల చేస్తార‌ని చెప్పుకొన్నారంతా.

అయితే వీరిలో ప‌వ‌న్‌ క‌ళ్యాణ్ మాత్రం స‌ర్దార్ గ‌బ్బ‌ర్‌ సింగ్ టీజ‌ర్‌ ని వ‌దిలాడు. ఇదివ‌ర‌క‌టిలాగే గుర్రం ప‌ట్టుకొని న‌డుచుకుంటూ వ‌చ్చే టీజ‌రే అయినా... దాన్ని చూసి మెగా అభిమానులు ఖుషీ అయ్యారు. అంతే కాదు.. 48గంట‌ల్లోనే ఒక మిలియ‌న్ వ్యూస్ క‌ట్ట‌బెట్టారు. ఆ ర‌కంగా బ‌న్నీ కూడా `స‌రైనోడు` సినిమాకి సంబంధించిన టీజ‌ర్‌ ని విడుద‌ల చేయొచ్చ‌ని ప్ర‌చారం సాగింది. కానీ అదేం జ‌ర‌గ‌లేదు. సినిమా చిత్రీక‌ర‌ణ కూడా చివ‌రి ద‌శ‌కు వ‌చ్చింద‌ని చెబుతున్నారు కానీ... బ‌న్నీ మాత్రం సంద‌డి చేయ‌లేదు. దీంతో ఆయ‌న అభిమానులు కాస్త నిరుత్సాహానికి గురయ్యారు. విశ్వ‌స‌నీయ వ‌ర్గాల స‌మాచారం మేర‌కు ఈ నెలాఖ‌రులోనే బ‌న్నీ టీజ‌ర్ విడుద‌ల కావొచ్చ‌ని తెలిసింది. బోయ‌పాటి శ్రీను ద‌ర్శ‌క‌త్వం వ‌హిస్తున్న స‌రైనోడుతోనే టాలీవుడ్ వేస‌వి సీజ‌న్ ఆరంభ‌మ‌య్యే అవ‌కాశాలు క‌నిపిస్తున్నాయి.