సుకుమార్ కే ఎందుకిలా?

రామ్ చరణ్ స్టామినాని బాక్స్ ఆఫీస్ బద్దలయ్యేలా చాటిన రంగస్థలం వచ్చి ఏడాది దాటి ఆ సంబరాలు పూర్తి చేసుకుని కూడా నెల రోజులు దాటేసింది. అయినా ఇప్పటిదాకా దర్శకుడు సుకుమార్ కొత్త సినిమా ప్రారంభం కానేలేదు. మహేష్ బాబు కోసం ఆరు నెలలు వేచి చూసి రెండు కథలు చెబితే ఏదీ నచ్చక సెట్స్ కు వెళ్లకుండా పరస్పరం బైబై చెప్పేసుకున్నారు. సరే పోనీ అల్లు అర్జున్ ఒప్పుకున్నాడు కదా వీలైనంత త్వరగా ఇదైనా స్టార్ట్ చేద్దామా ఆంటే అదీ జరిగే సూచనలు కనిపించడం లేదు.

ఇన్ సైడ్ టాక్ ప్రకారం బన్నీ ఇప్పుడు చేస్తున్న త్రివిక్రమ్ సినిమా పూర్తి కాగానే వేణు శ్రీరామ్ దర్శకత్వంలో దిల్ రాజు ప్లాన్ చేసిన ఐకాన్ కనబడుట లేదు సెట్స్ కి వెళ్ళిపోతాడట. మరి సుక్కు పరిస్థితి ఏంటి అని అనుమానం రావొచ్చుగా. దానికి సమాధానం ఉంది. త్రివిక్రమ్ సినిమా పూర్తయ్యేలోగా సుకుమార్ ఫుల్ బౌండ్ స్క్రిప్ట్ రెడీ కాకపోవచ్చట. మరోవైపు వేణు శ్రీరామ్ పక్కాగా స్క్రిప్ట్ సిద్ధంగా ఉంచుకోవడమే కాదు టీమ్ ని సెట్ చేసుకునే పనిలో పడ్డాడు.

నా పేరు సూర్య తర్వాత ఇప్పటికే ఏడాది గ్యాప్ తో అభిమానులను తీవ్ర అసంతృప్తికి గురి చేసిన బన్నీ ఈసారి అలాంటి పొరపాటు జరగకూడదు అంటే ఫలితంతో సంబంధం లేకుండా వరసగా ప్రాజెక్ట్స్ లైన్ లో పెట్టాలని నిర్ణయించుకున్నాడు. అందుకే సుకుమార్ ది ఆ టైంలోపు కాకపోతే వేణు శ్రీరామ్ వైపు యుటర్న్ తీసుకుని ఆ తర్వాత వచ్చే ఏడాది సమ్మర్ లో సుక్కుది మొదలుపెట్టే ప్లానింగ్ లో ఉన్నాడట. ఏదేమైనా నాన్ బాహుబలి స్థానంలో కూర్చున్న రంగస్థలం దర్శకుడికి ఇలాంటి సిచువేషన్ రావడం విచిత్రమే