బన్నీ ఐకాన్ ఇక కనిపించకపోవచ్చు..!

రెండేళ్ల క్రితం అల్లు అర్జున్ హీరోగా వేణు శ్రీరామ్ దర్శకత్వంలో 'ఐకాన్ - కనబడుటలేదు' అనే మూవీని ప్రకటించిన సంగతి తెలిసిందే. శ్రీ వెంకటేశ్వర క్రియేషన్స్ బ్యానర్ పై దిల్ రాజు ఈ చిత్రాన్ని నిర్మిస్తున్నట్లు వెల్లడించారు. అయితే కొన్ని అనివార్య కారణాల వల్ల ఈ ప్రాజెక్ట్ సెట్స్ పైకి వెళ్లలేదు. అదే సమయంలో బన్నీ 'ఐకాన్' ని పక్కనపెట్టి 'అల వైకుంఠపురంలో' 'పుష్ప' సినిమాలు లైన్ లో పెట్టుకున్నాడు. మరోవైపు వేణు శ్రీరామ్ కూడా పవన్ కళ్యాణ్ 'వకీల్ సాబ్' సినిమాతో బిజీ అయిపోయారు. దీంతో 'ఐకాన్' సినిమా అటకెక్కినట్లే అని అప్పట్లో కామెంట్స్ వచ్చాయి.

అయితే వేణు శ్రీరామ్ డైరెక్ట్ చేసిన 'వకీల్ సాబ్' సినిమా హిట్ అవ్వడంతో 'ఐకాన్' ప్రాజెక్ట్ మళ్ళీ వార్తల్లోకి వచ్చింది. ఇటీవల దిల్ రాజు మీడియాతో మాట్లాడుతూ తాము వెంటనే చేయబోయేది 'ఐకాన్' సినిమానే అని వెల్లడించారు. వేణు సైతం ఇటీవల ఓ ఇంటర్వ్యూలో మాట్లాడుతూ 'ఐకాన్' మీదే వర్క్ చేయబోతున్నట్లు చెప్పాడు. అయితే దర్శక నిర్మాతలిద్దరూ కూడా హీరో అల్లు అర్జున్ తో ఈ సినిమా చేస్తున్నామని చెప్పకపోవడం గమనార్హం. అయితే ప్రస్తుతం ఫిలిం సర్కిల్స్ లో వినిపిస్తున్న టాక్ ప్రకారం బన్నీ ఐకాన్ ఇక కనిపించే అవకాశాలు లేవని తెలుస్తోంది.

డైరెక్ట‌ర్ వేణు రెడీ చేసిన స్క్రిప్ట్ విష‌యంలోనే అల్లు అర్జున్ కాస్త అసంతృప్తిగా ఉన్నాడ‌ట. అందుకే ఇప్పుడు దిల్ రాజు ప్రొడక్షన్ లో బన్నీ సినిమా ఉండకపోవచ్చని అంటున్నారు. అంతేకాదు ఇప్పుడు వేరే హీరోతో 'ఐకాన్' ప్రాజెక్ట్ తెరకెక్కించాలని నిర్మాత ప్లాన్ చేస్తున్నారని టాక్ వినిపిస్తోంది. మరి త్వరలోనే ఈ విషయం పై క్లారిటీ వస్తుందేమో చూడాలి.